Недостатокот од смисла за хумор може да биде лош не само за вашиот социјален живот, туку и штетен по вашето кардиоваскуларно здравје.

Нова студија покажува дека смеењето го зголемува протокот на крв во телото, потврдувајќи ја како вистинита старата поговорка дека смеењето е најдобар лек, барем кога се работи за срцето.  

Кардиологот Мајкл Милер и колегите од Универзитетот во Мериленд го тестираа протокот на крв кај дваесет здрави мажи и жени откако претходно им беа прикажани од 15 до 30-минутни инсерти од комедии како "Кингпин" и "Нешто во врска со Мери" и стресен филм, почетната сцена од "Спасувајќи го војникот Рајан". Истражувачите го мереа крвниот проток пред секое гледање на филм, и една минута по завршетокот. "Сакавме да видиме дали смеењето ќе поттикне васкуларен одговор," објаснува Милер.

Претходно истражување го инспирираше тимот да го спроведе експериментот. Серија прашалници доставени од кардиолози до пациенти кои страдаа од срцеви заболувања открија дека пациентите кои преживеале срцев удар немале смисла за хумор во одредени ситуации (како на пример, носењето на ист костум на забава). Тие за 40%  помалку се смееле отколку здравите луѓе. "Не знаевме дали тоа беше причина и последица или само битен дел од заболувањето," вели Милер.

Тие решија да ги истражат можните здравствени ефекти од смеењето преку мерење на васкуларното проширување откако луѓето придушено ќе се насмееја на смешни нешта или реагираа на интензивни слики. Истражувачите извршија вкупно 160  мерења на крвен проток во брахијалната артерија, која ги поврзува рамото и лактот, кај 10 мажи и 10 жени. Додека се смееја, кај 19 од нив се зголеми протокот на крв во просек за 22%. Споредувајќи ги забавните и стресните состојби предизвикани од филмските инсерти, протокот на крв се зголемуваше за повеќе од 50% додека луѓето се смееја, според натписот објавен во списанието  "Срце".

Всушност, безгрижноста и среќата го зголемуваше дотокот на крв како што тоа го прават лесни вежби или лекови кои го снижуваат холестеролот. Од друга страна, стресот создаден преку драматика го преполови тој доток во иста мерка во која тоа го прават гневните сеќавања или менталните калкулации. "Тоа во најмала рака сугерира дека редовното смеење ќе отстрани дел од прекумерниот стрес со кој се соочуваме во секојдневниот живот," забележува Милер. "Пациентите кои подлежат на ризик од кардиоваскуларни заболувања би требало да се опуштат малку".