Во ретроспективна студија на пионери од Јута, научниците открија дека жените кои раѓаат близнаци живеат подолго, имаат повеќе деца од очекуваното, раѓаат деца во пократки интервали во подолг период постари се при последното раѓање, во споредба со другите мајки.

Откритието не мора да значи дека е здраво жените да имаат близнаци, туку дека здравите жени имаат поголема шанса да родат близнаци (ако не се земат во предвид интервенциите за плодност).

"Имањето на близнаци нема да ве направи посилни или поздрави, туку посилните, поздравите жени имаат поголема веројатност да добијат близнаци на природен пат," вели Шенен Робсон, првиот автор на студијата.

Истражувачот Кен Р. Смит додаде: "Преовладувачкиот став е дека теретот на раѓање деца кај жените е потежок кога станува збор за близнаци. Но, ние го откривме спротивното: жените кои носат близнаци на природен пат всушност живеат подолго и се поплодни."

Истражувачите ги прегледаа податоците од 58 786 неполигамски жени од Јута кои биле родени помеѓу 1807 и 1899 година, доживеале до 50 годишна возраст и се омажиле еднаш после 1850 година за сопрузи кои биле живи кога нивните жени имаа 50 години.

Од нив, 4603 беа мајки на близнаци и 54 183 родиле само по едно дете одеднаш.

Податоците дојдоа од базата на податоци за популацијата на Јута, која е една од најобемните светски компјутеризирани родословија и вклучува витални записи воглавно за мормонските доселеници во Јута и нивните потомци.

Импликации од близнците како индикатор за здравјето

"Луѓето се секогаш заинтересирани за тоа што влијае врз тоа колку ќе живееме," вели Смит, кој го води Ресурсот за потекло и популација на Универзитетот во Јута, кој ја одржува и средува базата на податоци за популацијата на Јута. "Комплицирано е. Постојат многу фактори кои придонесуваат за долговечноста, здравјето и стареењето."

"Оваа студија успеа да идентификува - и тоа е прилично нов резултат - друг важен фактор кој придонесува за здравјето и долговечноста во подоцнежните години, имено, дека жените кои раѓаат и се грижат за близнаци се поздрави," вели Смит.

"Вроденото здравје придонесува за нивната способност да имаат близнаци, а придонесуваат и за нивната долговечност."

Сепак, тој истакнува дека студијата ги опфаќаше жените кои живееа после менопаузата, а не оние кои починале порано, можеби при пороѓајот.

"Ние познаваме жени кои имаат близнаци, тројки и сепак имаат медицински компликации и нивното здравје понекогаш е компромитирано," вели Смит. "Но, ние зборуваме за долгиот поглед."

"Жените кои имаат деца се темелно млади и здрави," вели тој.

"Значи, ризикот за смрт при пороѓај е прилично низок. Жените кои имаат близнаци имаат некаков зголемен ризик за смртност при тие години (за раѓање), но поголемото мнозинство од тие жени достигнуваат до 50 годишна возраст и ние можеме да забележиме дека тие имаат поздрав живот."

Додека раѓањето на близнаци обично се повторува во семејствата, претходните студии покажаа дека срединските фактори се поважни - фактори како поголемо здравје кај мајката или раѓање во постари години, кои имаат поголема веројатност да продуцираат близнаци.

Студијата беше дизајнирана за да ги открие ефектите на природното раѓање на близнаци, а популацијата од студијата живееше пред да станат достапни контролата на раѓањето и третамните за неплодност.

"Ние велиме дека жените кои раѓаат близнаци на природен пат имаат нешто што ги прави поздрави," вели Смит.

"Ние успеавме да го откриеме тоа кај овие предци на жените бидејќи тие имаа многу деца и немаа третмани за плодност. Тие оставија наследство преку своите потомци кои можеби сите ја делат оваа посакувана особина за да се биде поздрав."

За денешните жени "кои имаат пристап до третманите за неплодноста и кои имаат близнаци - што не е ретко – но е едноставно не знаеме како тоа ќе влијае врз нивното здравје," вели тој.

"Не ги охрабруваме жените активно да бараат да имаат близнаци за да живеат подолго. Тоа не е заклучок кој можеме да го извлечеме."