Новата гранка на науката, синтетичката биологија, наскоро ќе биде во можност да направи вештачки вируси кои ќе бидат способни да управуваат со мозоците на луѓето.

Се ближи денот кога хакирањето на човечките мозоци ќе стане секојдневие, баш како што е тоа денес со компјутерите, тврдат научниците. Тие велат дека синтетичката биологија отишла толку застрашувачки далеку што за многу брзо време ќе биде во можност да направи вируси кои ќе управуваат со луѓето.

Синтетичката биологија, иако сеуште во јасли, станува од ден на ден една од најмоќните технологии во светот. Но, она што многумина ги загрижува е дека овие игри на научниците со генетиката и различните облици на живот може да се оттргнат од контролата и да отворат врата на една нова ера – ерата на биохакирањето и биотероризмот.

Бидејќи знаењето на човекот за ДНК нанотехнологијата и биомолекуларното сметање рапидно расте, овозможувањето на безбедност за мозокот може да биде приоритет во дваесет и првиот век.

Научниците објаснуваат дека бактериите и вирусите што денес ги среќаваме во природата се виновници луѓето да бидат болни, но на некој начин и го одредуваат однесувањето на домаќинот. Тие манипулираат со хемиски соединенија во човековото тело, а доколку некој ги програмира да испраќаат одредени „агенти" во мозокот, таквиот биопрограмер може да ја преземе контролата врз однесувањето на неговата жртва.

„Присуствуваме на зачетоците на синтетичката биологија. Основните задачи како што се декодирање, уфрлање на делови на ДНК и нивно исфрлање, како и релативно успешните обиди за клонирање, сега се врвот на науката. Но, ако се потсетиме, во осумдесеттите и компјутерската технологија беше во јасли, а каде е сега?" – вели Ендрју Хесел од Универзитетот Сингуларити во НАСА –„Клетките се живи компјутери а ДНК нивниот програмски јазик. Не е далеку денот кога маскирани преку вакцини, на пример, ќе се инјектираат специјално програмирани вируси кои хемиски ќе го репрограмираат однесувањето на домаќинот".

Синтетичката биологија е всушност наука која создава вештачки живот. Оваа интередисциплинарна гранка собира на едно место биолози, хемичари, инжинери, психолози... За разлика од досегашниот метод на анализа, проучување преку ситнење на живите суштества на најситни можни делови, синтетичката биологија го има обратниот пристап, таа од најситните делчиња се обидува да создаде вештачки живот. Таа е повеќе од генетски инженеринг затоа што овде не се работи само за пренесување на гени од едно на друго место, туку се прави конструкција на целосно нови живи суштества. Таканаречените биоконструктори, од ситните делови сакаат да создадат комплексни биолошки структури. Тие работат со најважните градбени елементи, ДНК молекулите, односно гените.