Замислете како би било никогаш да не заборавите ништо. Дали е тоа проклетство или благослов?

Засега само четири луѓе на светот поседуваат супер-меморија. Последниот случај е со маж од јужна Калифорнија, САД, чиј идентитет научниците немаат намера да го откријат. Според весникот “USA Today“, тој до детал ги помни најголемиот број денови од својот живот, како и деновите и датите во кои се случиле битни настани. Така тврди истражувачот Лари Кахил.

Весникот исто така ја интервјуираше и Џил Прајс, жена со супер-меморија, која своите искуства ги објави во книгата “The Woman Who Can’t Forget“.

Се уште постојат непознати факти за меморијата кои научниците допрва треба да ги откријат. Овој месец открија дека една единствена мозочна ќелија може во себе да ја содржи севкупната човекова меморија, но само на краток период. За долготрајна меморија потребно е да се поврзат мозочните ќелии.

Но како Прајс не заборава ништо? “За тоа се одговорни два дела од нејзиниот мозок: Опашестото јадро, кое обично се користи за меморија при формирањето автоматизирани навики; и дел од слепоочното крило во кој се меморизираат фактите, датите и настаните. Овие два мозочни дела можат да работат заедно, на досега несфатлив начин, за да го овозможат создавањето на незаборавни врски (супер-меморија)“, изјави Кахил за “USA Today“.

Истражувачите веруваат дека доколку подобро ја разберат оваа појава, ќе успеат да изнајдат начини за подобрување на меморијата кај обичните луѓе.