Едно истражување направено врз луѓе на возраст од 45 до 69 години вели дека промените во спиењето се јавуваат како резултат на слабата когнитивна функција.

Дали ви се случува да спиете се’ помалку и помалку како што стареете? Или пак, спиете повеќе од порано? Како и да е, ова може да значи дека вашиот мозок прерано почнува да старее.
При истражување што беше направено врз повеќе од 4 500 луѓе на возраст од 45 до 69 години, научниците открија значаен пад на работата на мозокот кај луѓето кои во период од 4-5 години забележале промени во спиењето кое дотогаш било нормално.
„Резултатите покажуваат дека луѓето кои забележале промени во спиењето, во натамошниот живот имаат послаба когнитивна активност на мозокот,“ – вели Џејн Фери од одделот за епидемиологија и јавно здравство од медицинската школа на Универзитетот во Лондон.

Испитаниците беа прашани за нивните навики поврзани со спиењето од 1997 до 1999 година за да формираат една основа, а потоа истражувањето беше повторено од 2002 до 2004 година. Нивната когнитивна функција беше под надзор со помош на мерила за меморијата, фондот на зборови и разумот. Исто така, врз нив беше направен и краток тест за самата состојба на мозокот со цел да се забележат и првите знаци на деменција кај оние што ги имале.
Жените кои спиеле околу 7 часа и мажите кои спиеле по 6 часа имале највисок резултат. Спиењето пократко од 6 часа или пак подолго од 8 часа покажало послаби резултати.

Притоа, истражувачите анализираа како се менувале навиките поврзани со спиењето кај луѓето во текот на тие неколку години. При второто мерење од 2002 до 2004 година, 7,4% од жените и 8,6% од мажите изјавија дека, споредено со првиот период од 1997 до 1999 година, ним спиењето им се продолжило.
Кога се направи споредба помеѓу луѓето кои не ги смениле навикита за спиење од почетокот на истражувањето, оние кои почнале подолго да спијат покажаа послаби резултати на тестовите за мерење на когнитивната способност. Не се сменила само меморијата.

Кај 25% од жените и 18% од мажите, времетраењето на сонот значително се намалил. Кај овие луѓе, резултатите при мерењето на разумноста, фондот на зборови и целосната когнитивна способност биле послаби.
Квалитетниот сон е значаен за правилното функционирање на организмот, велат истражувачите. Лошиот сон е поврзан со голем број на ментални и психички заболувања. Но, исто така и премногу сон може да делува лошо врз здравјето.
„Застрашувачките ефекти од премногу, премалку или премногу лошо спиење врз здравјето на луѓето полека добиваат поголемо внимание,“ – вели Фери.
„Со оглед на тоа дека ова општество функционира нон стоп и постојано влијае врз животот на луѓето, треба да обрнеме повеќе внимание на промените при спиењето и какви можат да се понатамошните влијанија од таквите промени.“