Без оглед на многубројните истражувања, човечкиот мозок до денес е мистерија за научниците...

A што се однесува до „обичниот свет" тој има слаба претстава како е тој конструиран и како функционира, пишува интернет изданието на весникот „Times of India".

Соработниците на Националниот институт за здравство во САД подготвија список на 10 најпопуларни заблуди за мозокот, меѓу кои една од најпознатите и најраспространетите e дека човекот користи само 10 отсто од својот мозок.

Самото тврдење е од почетокот на минатиот век и се припишува на популарниот американски психолог Вилијем Џејмс, кое звучи убедливо, но е погрешно.

Резултатати од скенирање на мозокот јасно покажале дека за исполнување на конкретна задача потребна е хармонична работа на различни делови на мозокот.

Вториот мит се однесува на луѓе кои патат од аутизам. Се смета дека тие имаат посебни, вродени таленти, што е уште еден мит кој го создаде телевизијата. Експертите констатирале дека таквите пациенти можат да имаат одлични физички потенцијали, но тоа не може да се каже за умствени.

Исто така, многумина сметаат дека шизофренијата значи поделена личност, но тоа всушност е психичко растројство кое се карактеризира со проблем со концентрацијата, халуцинации, социјална изолираност и недвижење.

Некои пак сметаат дека мозокот не се менува, но тоа не е така – мозокот одлично се обновува по повреди и се реконструира. А алкохолот, наспроти распространетото верување, не ги убива клетките на мозокот, иако неговата конзумација може да влијае на мозочниот систем, но само на дендритите – куси, разгранети продолжетоци, преку кои невроните добиваат информации. Додуша, реткиот синдром Вернике – Корсаков, се карактеризира со губење на неврони во некои делови на мозокот, но тоа не е примарен ефект од алкохолизам, туку секундарен ефект на недостаток на витамин Б, предизвикан од прекумерно конзумирање на алкохол.

Како погрешно се наведува и тоа дека оштетувањата на мозокот се „вечни". Меѓутоа, се зависи од степенот на местото и повредата, умерените трауми лесно се контролираат, вечни и неповратни остануваат само тешките повреди, но сите повреди не го доведуваат човек до вегетативна состојба.

Една од најстрашните заблуди е и таа дека луѓето имаат најголем мозок. Со паралелно истражување е откриено дека просечен човечки мозок тежи околу 1,4 килограми, а мозокот на цицач од видот на китови (Physeter catadon) тежи околу 7,7 килограми.

Вистина, некои научници потенцираат дека не е важна големината на мозокот, туку пропорцијата на големината на мозокот и телото, која кај луѓето е околу 1:50, додека кај другите животни околу 1:180 или 1:120.

Важно е и тоа колкав дел од мозокот е ангажиран во когнитивната функција за распознавање, а од сите цицачи човекот има најголема мозочна кора (cerebral cortex) вклучена во функциите на памтење и говор.

Ако се говори за структурата на мозокот, некои луѓе веруваат дека мозокот е компактна маса, иако тој се состои од безброј клетки – ганглии и неврони. Една од 10 заблуди е и таа дека човекот има само пет сетила. Меѓутоа, вкусот, мирисот, допирот, слухот и видот навистина се најсилни, но не се единствени сетила. Постојат и други, како што се чувство за рамнотежа, болка и положба на телото во просторот.

Митот за тоа дека со слушање на музика на Моцарт, кои ја практикуваат идни родители, може да се стане попаметен, прв пат го опиша истражувачот Алфред Томатис, а стана популарен благодарение на музичарот Дон Кемпбел. Верувањето стана многу популарно, но ниту едно истражување до сега не ја потврдило таа теорија.