Методот за комуницирање со луѓе со оштетен мозок кои се во вегетативна состојба е откриен од научници од Велика Британија и Белгија...

Тие објаснуваат како ја мереле електричната активност во мозокот за да ја откријат свесноста.
Техниката која е позната како EEG, е сосема безболна и се применува со прикачување две електроди на главата.
Докторите се надеваат дека во иднина овој метод ќе се употребува како алатка за дијагностицирање и во болниците, и во домовите.  
Во истражувањето беа вклучени 16 пациенти од една болница во Кембриџ и универзитетската болница во Лиг, Белгија.
Сите пациенти имале дијагноза дека се во вегетативна состојба - кога личноста е во будна состојба, но не е свесна за себе и за околината.

Од пациентите беше побарано да си замислат дека мрдаат со прстите на нозете или пак дека ја стегаат десната рака. Активноста на мозокот кај 3 од 16 пациенти покажа дека овие луѓе ги следат нивните предлози.
Рој Хаим немал повреди во мозокот но сепак, даде објаснување за тоа како се чувствувал додека бил парализиран и не можел да комуницира.
Професорот Адриен Овен од Универзитетот на Онтарио, Канада, вели: „Многу предели на мозокот што се активираат кога се движиме, истовремено се активираат кога замислуваме дека се движиме. Сигурни сме дека овие 3 пациенти беа свесни затоа што неколку пати реагираа на насоките што им ги дававме. Еден од нив покажа реакција дури 100 пати.“

"Погрешна дијагноза"

Тимот на професорот Овен од Кембриџ претходно покажа дека има можност за комуникација со пациенти во вегетативна состојба преку магнетна резонанца.
Меѓутоа, кај некои пациенти овој метод со скенирање не функционира затоа што на нив имаат закачени метални покривки или игли, или пак не можат да стојат мирно.
Алатката EEG е прилично поевтина и лесно пренослива. Професор Овен вели: „Ова е навистина значаен напредок затоа што вака алатката ќе може да се пренесе до сите болници и домови.“

Хелен Џил-Твејтс, консултант, вели: „Оваа нова алатка ќе биде корисна во дијагностицирањето на многу пациенти. Тажно е тоа што сум запознала многу пациенти за кои не била направена вистинска проценка туку едноставно им била поставена дијагноза дека се во вегетативна состојба.“
Пол Метјуз, професор по клиничка неврологија на одделот за медицина во Лондон, вели: „Станува збор за едноставен и практичен начин со кој на пациентите ќе им се помогне во комуникацијата.“