Истражувачи од САД велат дека пост-смртната анализа на неколку деца со аутизам покажа дека нивниот мозок е потежок и содржи повеќе неврони отколку нивните врсници кои не страдаат од ова нарушување...

Иако станува збор за мало истражување, тоа покажува дека зголемувањето на мозокот се случува уште во утробата. Истражувачите направија анализа на мозокот на 7 деца со аутизам. Пет од овие деца се удавиле, едно дете починало од рак на мускулите а причината за смрт на последното дете  не била откриена.

Кога направија споредба на снимките на мозокот на деца без аутизам кои починале во сообраќајна несреќа, истражувачите открија дека мозокот на аутистите имал за 67% повеќе неврони во предфронталниот кортекс. Исто така, мозокот на аутистичните деца бил за 18% потежок отколку мозокот на другите деца. „Затоа што кортикалните неврони не се генерираат во постнаталната фаза, овој патолошки раст на невроните кај аутистичните деца укажува на преднаталните проблеми.“ - покажува истражувањето. Истражувачите сметаат дека „ваквото репродуцирање на дефектни клетки можеби е вклучено во самиот развој на аутизмот.“

Предфронталниот кортекс е предел во мозокот каде се развива јазикот и комуникацијата, како и однесувањето, вниманието и социјалната способност. Токму поради ова, аутистите имаат проблеми на овие полиња. Меѓутоа, за да се потврдат овие податоци, потребни се понатамошни истражувања. Исто така, треба да се одреди како разликите во мозокот се поврзани со сериозноста на симптомите кај аутистите.
„Кај аутистите, факторите што го организираат мозокот се пореметени. “ - вели Џенет Лејнхарт од Универзитетот во Јута.
Претходните истражувања покажуваа дека клиничките сигнали за аутизам се појавуваат во периодот кога мозокот и главата на детето почнува абнормално да расте, а тоа се забележува на возраст од 9 до 18 месеци.

Аутизмот вклучува бројни развојни разлики почнувајќи од општествено различен излед на детето до целосна неспособност за комуникација, повторувачки движења, чувствителност кон одредена светлина и звук и проблеми со однесувањето. Во 110 деца, едно има дијагноза на аутист. Оваа болест е за 3-4 пати почеста кај момчињата отколку кај девојчињата.