Сестрите можат навистина да ви го загорчат љубовниот живот - особено ако сте стаорец.

Ново истражување откри дека машките стаорци растени со многу сестри се помалку привлечни за женките со кои не се роднински поврзани, во споредба со стаорците кои потекнуваат од балансирана средина или легла во кои доминираат мажјаци.

Многу истражувања докажаа дека браќата и сестрите, како и редоследот на раѓање влијае врз подоцнежното однесување и кај луѓето и кај животните. На пример, женките стаорци кои во матката се наоѓаат помеѓу два мажјаци, во текот на животот повеќе ќе манифестираат машки карактеристики при однесување, бидејќи пренатално биле изложени на машки хормони.  Други истражувања открија дека односот на мажјаци и женки во леглото влијае врз нивното подоцнежно однесување како возрасни.

Кај луѓето, сестрите ја спречуваат појавата на депресија кај нивните браќа и сестри, а постарите браќа може да предизвикаат агресија.

Психобиологот Дејвид Крус од Универзитетот од Тексас, Оустин, сакаше да ги оддели ефектите од животот пред и по раѓањето. За таа цел, тој и неговите колеги ги преброија малите стаорчиња за да го одредат бројот на мажјаци и женки во утробата. Потоа, по раѓањето заменија некои од младенчињата, собирајќи ги во легла така што некои од нив имаа еднаков број на браќа и сестри, додека кај другите побројни беа машките или женските.

Како што стаорците растеа, истражувачите открија дека односот меѓу половите немал никакво влијание врз нивното однесување. Но, кај машките стаорци, полот на нивните браќа и сестри не беше занемарлив фактор. Кога мажјаците кои растеа со многу сестри беа претставени пред рецептивни женки, тие поминуваа помалку време набљудувајќи ги, во споредба со мажјаците пораснати во балансирани легла и легла во кои побројни беа мажјаци. Но, и тие успеваа да се спарат со женките и да имаат потомство исто како и поатрактивните.

“Мажјаците се поефикасни при парењето,” вели Крус во една изјава.

Ефикасноста може да биде компензација за фактот дека мажјаците растени со многу сестри се помалку атрактивни за женките стаорци. Тоа можете да го забележите набљудувајќи ги женките, вели Крус. Доколку сакаат да се парат, ќе направат потег наречен “стрелка-скок” и мрдаат со ушите.

“Тоа ги полудува мажјаците,” вели Крус.

Женките го многу помалку го изведуваат овој провокативен танц за машките од легла во кои побројни се женките, отколку за мажјаците од другите легла.

Резултатите, објавени во списанието Psychological Science, имаат импликации и за луѓето, вели Крус.

“Тоа покажува дека семејствата се важни,” вели тој. Средината во која сте растеле, вели тој, “не ја детерминира личноста, но помага во нејзиното формирање.”