Според едно ново истражување, животните почесто се разболуваат при полна месечина отколку во останатите периоди од месецот.

Истражувањето покажува дека за време на полна месечина, случаите на заболени животни се зголемуваат. При испитувањето на 11 940 случаи на медицинскиот ветеринарен центар во Колорадо, истражувачите откриле дека тогаш ветеринарните посети се интензивираат за 23% кога станува збор за мачките, и 28% за кучињата.

Итните случаи најчесто биле или за срцев удар или некаква траума.

„Често се случува да ги слушнете ветеринарите кога има многу работа да речат: „Господе, да не е полна месечина?“ – вели главниот истражувач Реган Велс од Универзитетот за ветеринарна медицина и биомедицински науки. „Се верува дека тогаш имаат најмногу работа.“

Меѓутоа, верувањата не помагаат во науката. И покрај бројките кои кажуваат многу, Велс сеуште не знае зошто се случува ова.

„Тешко е да се објасни клиничката значајност на овие податоци,“ – вели таа.

Истражувањата за мистериозните лунарни врски имаат долга историја меѓутоа покажуваат различни резултати. Пар истражувања од 2001 година испитуваа колку луѓе се нападнати од животни за време на полна месечина. Британските истражувачи открија лунарна врска, додека истото истражување во Австралија покажа дека овие појави не се поврзани.

Неодамна, научниците открија дека загадувањето на плажите е поголемо за време на полна месечина. Ова откритие е поврзано со варијациите поврзани со месечевиот циклус.

Поврзувањето на однесувањето на животните со фазите на месечината се покажа како нелогично. Едно објаснување е дека повеќе луѓе и животни се надвор за време на полна месечина затоа што ноќта е посветла и пријатна за прошетка. Ова објаснување пак, ја оправдува одлуката на британската полиција за зголемување на патролите за време на полна месечина.