Нов систем на вештачка интелигенција му овозможува на робот-хеликоптер самиот да учи да лета.

Сето тоа го учи гледајќи ги другите хеликоптери што прават. Резултатот е автономен хеликоптер кој може да изведе цел дијапазон трикови низ воздухот потполно сам, велат неговите творци.

Тие се "најтешките воздушни акробатски маневри кои досега ги има изведено хеликоптер контролиран од страна на компјутер," изјави Ендрју Енџи, професор на Стенфорд Универзитетот кој го предводеше истражувањето на дипломираните студенти Питер Абел, Адам Коутс, Тимоти Хантер и Морган Квигли.

Роботот не користи софтвер за да го контролира летањето, туку учи набљудувајќи експерт, и притоа односот е од видот "ученик-ментор". Радио-контролниот пилот Герет Оку оперира со модел на хеликоптер од 4 стапки кој ја има улогата на експерт.

"Герет може да работи со било кој хеликоптер, дури и со некој што никогаш порано го нема видено, и да се впушти во неверојатни воздушни акробации. Прашањето кое отсекогаш сме си го поставувале е: Зошто компјутерите не можат да направат такво нешто?" вели Коутс.

Изгледа дека можат.

Хеликоптерот кој е управуван од вештачка интелигенција, е најнов модел кој покрај својот нов "мозок", може да изведува превртувања, нагли свртувања, лупинзи, вртења во место со пируети и друго. Тој дури може да изведе и "тик ток", при кој хеликоптерот, додека е поставен право нагоре, започнува да се ниша од една на друга страна, како да е клатно на ѕиден часовник кој е поставен надолу.

"Мислам дека опсегот на маневри кои може да ги изведе е најширок досега" во самоуправувачката хеликоптерска област, изјави Ерик Ферон, професор по аеронаутика и астронаутика на Џорџија Тек Универзитетот кој има работено на вакви самоуправувачки хеликоптери додека беше на МИТ. "Но она што е поимпресивно е технологијата која е основа на целата оваа работа. На еден начин, машината се учи сама преку набљудување на стручен пилот во лет. Ова е неверојатно."

Хеликоптерите не се лесни за контролирање. Потребно е постојано залагање со цел да се одржи хеликоптерот стабилен.

"Хеликоптерот не сака да лета," вели Оку. "Тој секогаш сака само да се преврти и удри во нешто."

Ученикот-хеликоптер е опремен со додатни инструменти, како мерачи на забрзувањето и жироскопи па се до магнетометри, кои со помош на Земјиното магнетно поле одредуваат во кој правец е насочен хеликоптерот.

Во иднина, вакво летало може да се покаже корисно при пребарување на заталкани мини во земјите погодени со војна или пак при обележување на критичните точки каде што беснеат шумски пожари.