Интернетот е многу поуспешен начин за пронаоѓање на сериозна врска и пријателства отколку што досега се сметаше.

Нова студија спроведена врз корисници на сајтови за запознавање откри дека од двојките кои изградиле сериозен однос преку праќање мејлови или он-лајн разговори, 94% изјавиле дека ќе се видат повторно.

Веројатно изненадувачки, студијата спроведена од страна на др. Џеф Гавин од Бат Универзитетот, исто така откри дека мажите беа емоционално поприврзани за своите "интернет партнерки" отколку жените, а воедно и попосветени на врската.

Сепак, старомодната романтика не е изумрена: Наодите од истражувањето покажаа дека размената на подароци е најдобар начин за да се осигура посветеност на врската.

Истражувањето на др. Гавин доаѓа во време кога бројките за користење на интернет агенции за запознавање рапидно се зголемуваат: Се верува дека околу 6 милиони Британци се корисници на овие услуги.

Др. Гавин, со др. Едриан Скот од Бат Универзитетот и др. Џил Дуфилд од Западниот Универзитет во Англија, спроведоа он-лајн анкета над 229 луѓе, на возраст од 18 до 65 години, кои користеле британски интернет сајтови за запознавање. Притоа, беа запрашани која им била најзначајна врска која ја имале он-лајн.

Студијата покажа дека:

- 94% од испитаниците повторно се сретнале со својот "интернет партнер" и по првата средба. Врските во просек траеле најмалку седум месеци, при што 18% од нив траеле повеќе и од една година.

- мажите биле многу повеќе попосветени на врската отколку жените, а воедно и повеќе зависеле од својата "интернет партнерка".

- колку повеќе двојката била вклучена во он-лајн разговор (chat) пред да се сретнат, отколку да разменуваат и-мејлови, толку повеќе се зголемувало нивното меѓусебно разбирање и емоционалната меѓузависност.

- оние кои си размениле подароци пред да се сретнат имале подлабока и позначајна врска.

- колку повеќе партнерите разговарале по телефон, толку била позначајна и нивната врска.

Др. Гавин, од Одделот за Психологија при Бет Универзитетот, и неговите ко-автори открија дека интернет корисниците ретко се служат со камери кои им овозможуваат да се видат меѓусебно, бидејќи преферираат да имаат поголема приватност на тој начин што ќе се допишуваат или разговараат по телефон.

"Оваа студија покажува дека он-лајн состаноците се ефективни за голем број луѓе, и доведуваат до успешни средби кај скоро сите кои ги испитувавме," изјави др. Гавин.

"Со оглед на тоа дека најуспешните врски траеја најмалку седум месеци, а во некои случаи и повеќе од година, се чини дека овие врски се успешни слично како и оние кои настанале на поконвенционални начини."

"Откривме дека мажите имаат поголема тенденција да бидат посветени на он-лајн врските отколку жените, веројатно поради тоа што анонимноста на пишувањето им пружа шанса да ги изразат своите емоции полесно отколку во реалниот живот."

"Исто така дознавме дека луѓето избегнуваат да користат веб-камери бидејќи сметаат дека е важно да не ги видат своите партнери некое време – има нешто посебно во врските базирани врз пишување"

Др. Гавин верува дека причината поради која користењето на телефоните и он-лајн четовите на интернет укажува на подлабока врска е што ова се методи на симултана комуникација, додека пак и-мејловите се повеќе формални.

Од врските, 39% се уште постоеја за време на анкетата, и од нив 24% траеја најмалку од една година а 8% најмалку две години. Од врските кои беа завршени за време на анкетата, 14% траеја повеќе од една година, а 4% траеја повеќе од две години.