"Родено" е првото бебе робот по име Ај-Кјуб кое ќе учи да зборува.

Научниците од Училиштето за Компјутерска Наука во Хердфоршајр, Велика Британија со помош на Ај-Кјуб ќе се обидат да дознаат колку брзо роботите можат да научат одреден јазик.

Професорите Кристофер Нејханив и Керстин Даутенхан од Училиштето за Компјутерска Наука при Универзитетот во Херфордшајр работеа со меѓународен конзорциум предводен од Универзитетот во Плимут на ITALK (Integration and Transfer of Action and Language Knowledge in Robots).

ITALK се стреми кон тоа да научи робот да зборува на ист начин на кој што тоа го прават родителите со своите деца. Нејханив и Даутенхан, кои се европски лидери кога станува збор за вештачката интелигенција и комуникацијата помеѓу луѓето и роботите, спроведоа експерименти во областа на интеракцијата помеѓу луѓето и роботите со цел да му овозможат на роботот да разговара со луѓе.

Типичните експерименти со Ај-Кјуб роботот вклучуваа активности како уфрлување предмети или разни форми во соодветни дупки на кутија, подредување на шолјички за кафе во тацни и сложување на исечени дрва. Исто така, ај-Кјуб требаше да именува предмети и дејствија притоа користејќи основни фрази како "робот става стап во цевка."

Професор Нејханив изјави: "Нашиот пристап е дека роботот ќе учи индивидуално и социјално од другите да започне со учење на јазикот, и ќе ги искористи своите јазични способности со цел да ги подобри своите општествени и манипулативни способности. Ова создава позитивен повратен циклус помеѓу користењето на јазикот и развивањето на останатите когнитивни способности. Како што детето учи имитирајќи ги своите родители и стапувајќи во взаемно дејствување со својата околина, така и роботот ќе овладее со основните принципи на структурната граматика, како негирањето, користејќи ги овие способности таму каде што е потребно."

Научниот и технолошки пристап развиен за времетраење на проектот ќе има значајно влијание врз идната генерација на интерактивни роботски системи во наредните десет години и водечката улога која Европа ја има во оваа област.

Говорејќи за истражувањето, професор Даутенхан изјави: "Ај-Кјуб ќе не однесе чекор понапред во развојот на роотите како социјални придружници. Се занимававме со прашањата како би требало да изгледаат роботите и како луѓето ќе сакаат да им пристапуваат, а сега, во рамките на една година, успеавме да го создадеме првиот хуманоиден робот кој е способен да научи јазик."