Дали луѓето ги прикажуваат своите вистински или идеализирани карактеристики на сајтовите за социјално вмрежување?

Сега има повеќе од 700 милиони луѓе низ светот со профили на сајтовите за социјално вмрежување како Facebook и MySpace. Во САД 75% од лицата меѓу 18 и 24 години кои имаат пристап до интернет - користат сајтови за социјално вмрежување. Во последните четири години, нивната употреба се има зголемено четирикратно во рамките на сите старосни групи.

Но, дали овие профили ни откриваат нешто за вистинските карактеристики на луѓето? На Интернет е многу лесно да се прикаже идеализирана верзија од себеси пред останатите. Според тоа, искушението да се претера или да се даде потполно погрешна импресија е едноставно преголемо. Дали е тоа случај со Фејсбук корисниците?

Вистински наспроти идеализирани личности

За да се утврди дали е така, психолозите регрутираа 236 американски и германски студенти кои користат сајтови за социјално вмрежување и спроведоа целосни мерења на личноста (Back et al., 2010).

Најпрвин беа мерени нивните вистински карактеристики преку она што психолозите го карактеризираат како “Големите 5” карактеристики на личноста (петфакторски модел на личноста - екстровертност, толерантност, совесност, невротичност и отвореност за нови искуства). Потоа беа измерени нивните идеализирани карактеристики, односно оние особини кои сакаат да ги поседуваат.

Потоа - на независни набљудувачи им беа покажани нивните вистински профили за социјално вмрежување според кои требаа да ги рангираат карактеристики на учесниците.

Изненадувачка вистина

Откако вистинските карактеристики беа споредени со - идеализираните и набљудуваните, истражувачите открија дека, е многу поголема веројатноста луѓето да ги прикажат своите вистински карактеристики на сајтовите за социјално вмрежување, отколку својата идеализиран верзија.

Општо земено, луѓето беа неверојатно искрени кога се презентирале себеси. Луѓето беа искрени - не ги читаме овие зборови многу често.

Во согласност со досегашните наоди, ова истражување откри дека кога се гледа нечиј профил за прв пат, некои аспекти на личноста се потешки за распознавање. Невротичноста кај останатите е особено тешка да се процени, додека за разлика од неа, екстровертноста и отвореноста кон нови искуства лесно се проценува, дури и кај непознати.

Онлајн лажење?

Ова истражување е уште еден удар за стариот стереотип според кој Интернетот е страшна алтернативна реалност, место каде што може се да пројде и ништо не е како што изгледа на прв поглед - преполнето со адолесценти кои се преправаат дека се нешто што не се.

Спротивно на општоприфатените ставови, како и академското теоретизирање дека Интернетот ги охрабрува луѓето да презентираат идеализирана слика за себеси, ова истражување сугерира дека луѓето се неверојатно искрени кога ги прикажуваат своите вистински карактеристики онлајн.

Без оглед на причината, овој факт може да помогне за да се објасни феноменалната популарност на сајтовите за социјално вмрежување: Вистината ги привлекува луѓето.