Претерувањето и лажењето се задолжителни придружници на таканаречените "спам" пораки кои луѓето секојдневно ги добиваат на своите и-мејл адреси. Но ново истражување откри дека искреноста преовладува во и-мејловите помеѓу луѓе кои добро се познаваат меѓусебе.

Студенти кои ги евидентираа своите лаги за времетраење од една недела изјавија дека неискреноста е застапена во 15% од нивните и-мејл пораки, во споредба со повеќе од една третина од телефонските разговори, 20% од чет пораките и 25% од разговорите во четири очи.

Др. Џефри Т. Хенкок , главниот истражувач, наведе две можни објаснувања. Првото е дека и-мејлот остава пишана трага, а тоа можеби предизвикува претпазливост. Според второто, конверзацијата преку и-мејл се одвива бавно.

"Претходните истражувања укажуваат дека повеќето од лагите се спонтани и обично искрснуваат од разговорот," запиша Др. Хенкок во и-мејл порака. "Овие видови на неочекувани лаги би требало да бидат повеќе застапени во телефонски разговори или други форми на комуникација отколку во и-мејл."

"Не се сите лаги лоши," вели Др. Хенкок, "но дефинитивно многу повеќе лажеме на телефон."

Др. Хенкок, чии наоди беа презентирани на конференција за Човечко-Компјутерска Интеракција во Виена, изјави дека во неговата лабораторија моментално се проучуваат начините на комуникација од друга гледна точка, притоа обидувајќи се да одреди при кои форми на интеракција е повеќе или помалку веројатно луѓето да бидат изиграни.

"Она што го откривме во нашата лабораторија е дека мотивацијата игра важна улога," запиша тој, додавајќи дека помотивираните лажговци полесно можат да бидат откриени во разговор во четири очи отколку преку пишана комуникација.