Променете ги мислите и начинот на живот преку медитација.

Придобивките од медитацијата не се новост. Медитацијата со децении е препорачувана од страна на врвната медицина како докажан начин за да го намалите стресот и да се релаксирате. Всушност, да не беше резултатот на релаксација, една чиста верзија на источната медитација која стана популарна пред 30 години, тешко дека едно секуларно општество ќе беше убедено дека медицината е навистина ефикасна. До скоро, зборовите како “мир” и ”бистрина” биле поврзувани само со религијата.

Едно ново истражување на општата болница во Масачусетс покажува дека доволни се осум недели медитација за да се забележат промените на неколку полиња на мозокот кои се поврзуваат со чувството на мир и подобрувањето на свесноста за себе, емпатијата и подобрената меморија. И ова, исто така, не е новост. Уште од седумдесеттите години се знае дека промените во мозочните бранови, поточно алфа брановите се поврзуваат со редовната медитација. Денес, со постоењето на пософистицирани прикази на мозокот, истражувачите можат полесно да одредат каде точно настануваат овие промени со огромна прецизност.

Фактот дека кратко време е потребно за да се стигне до придобивките е навистина големо изненадување. Слики на мозокот на будистичките свештеници покажаа огромна промена на гама брановите во префронталниот кортекс, регион поврзан со повисоките когнитивни реакции како и моралните чувства за сочувствување. Но, да знаете дека долгоживотниот медијатор произвел гама бранови на 80 циклуси во секоја секунда наместо вообичаените 40, иако им звучело фасцинантно на нервонаучниците, е сепак далеку од секуларните “западњаци”. Сега може да се каже без никаков страв дека ќе звучи “премногу источно”, дека медитацијата го изострува мозокот и дава придобивки за сите. Старите муабети дека зјапањето во папокот ве прави пасивни и “премногу смирени” еднаш за секогаш ќе престанат.

Се претпоставува дека следниот чекор ќе биде откритието дека медитацијата ќе направи промени при изразувањето на гените. Доктор Дин Орниш, експерт за медитација, здрава исхрана и редовно вежбање, пред скоро време откри дека се промениле повеќе од 400 гени заедно со тие кои се менуваат со здрава исхрана и вежбање. Врската меѓу мозокот и гените е сепак новост, и делува ветувачки при промената на најосновните претстави за нив. Со децении, се земал здраво за готово ставот дека ни мозокот ни гените можат да се менуваат на некој особен начин (освен негативно, преку стареењето и боледувањето), но сега знаеме дека мозокот е многу подинамичен и склон кон промени. Всушност, секоја промена во мозокот почнува преку генетското менување – мозочните келии создаваат нови врски и самите се лекуваат преку произведување на протеини и ензими, а ним им требаат генетски сигнали кои не можат да се создадат сами по себе.

Ако пробате да гледате поглобално, тоа што ќе го забележите е зачудувачко. Има еден директен пат кој започнува во мозокот – со медитација, исполнет ум или некои поосновни работи како верувања и емоции – а потоа патот води до гените, каде сингалите што се праќаат ги менуваат мозочните келии, кои потоа ги праќаат нивните сигнали како невропренесувачи кон секоја посебна ќелија во телото. Причината зошто осум недели се доволни за да предизвикаат значајни промени во мозокот е дека текот што ги поврзува умот, гените и мозокот работи секоја втора секунда во нашиот живот. На крај, резултатите ќе отвараат нови полиња. Ќе можеме да откриеме дека свесноста на лицата ги урамнотежува и контролира сите процеси на телото кои можете да ги замислите. Старата мисла дека “биологијата е судбина” ќе треба сериозно да се преиспита. Добра замена на ова би било “свесноста е судбина” што ќе биде главен доказ дека медитацијата се појавила прва. Се предвидуваат огромни можности за лична слобода. Наместо вашите гени да ви го диктираат животот и хемиските процеси во мозокот, ќе сфатите дека вие го креирате вашиот живот, вие сте способни за промена, исцелување, креативност и лична трансформација. Кој не би сакал да биде слободен за да ја пишува сопствената програма што го води мозокот и телото? Вакво беше духовното ветување илјада години наназад. Време е модерното општество да се разбуди и да сфати дека ова ветување сеуште е остварливо.