Иако на некоја "мрсна шега" може да се насмеат сите на работното место, таа веројатно ќе го наруши моралот.

Тоа е еден заклучок од новото истражување објавено во "Журнал за Применета Психологија" чии ко-автори се истражувачите од Ротман Училиштето за Менаџмент при Универзитетот во Торонто и Саудер Училиштето за Менаџмент при Универзитетот на Британска Колумбија.

Авторите на студијата ги набљудуваа ефектите од однесувањето со сексуална конотација на работното место како "мрсни шеги", алузии, дискусии за сексот и флертови. Најпрвин испитаа дали мажите и жените воопшто добија нешто позитивно од ваквото однесување, како уживање и социјална поврзаност.

Научниците открија дека некои вработени уживаа во ваквото однесување на работното место – 25% од оние кои му беа изложени го окарактеризираа како ласкаво и забавно додека половина се изјаснија како неутрални. Но дури и оние кои уживаа беа склони кон повлекување од работа, се чувствуваа помалку ценето и имаа депресивни симптоми повеќе од оние кои беа изложени малку или воопшто на вакво однесување. Резултатите беа откриени меѓу мажи и жени кои работат во производството, социјалните услуги и на универзитетите.

"Му пристапивме на истражувањето со отворен ум," вели проф. Џенифер Бердал од  Ротман Училиштето, ко-автор на студијата со проф. Карл Аквино при Саудер Училиштето. "Мислевме дека можеби ова однесување е позитивна работа за вработените кои уживаат во него. И тогаш откривме дека не е."

Проф. Бердал сугерира дека наодите од студијата треба да се третираат како мудар совет за вработените и работодавците да се избегне впуштање во односи со сексуална конотација на работното место.

"Во нашата култура, сексуалноста има конотации на доминација, подреденост и ранливост," изјави таа. "Често доминантното однесување се користи како средство за да се направи некој понизен или засрамен. Зошто тоа да се случува на работното место?"