Вработените секое утро се будат среќни, но нивното добро расположение се губи веднаш штом почнат да ги извршуваат работните обврски.

Тоа го покажа двегодишното следење на пораките испратени преку социјалната мрежа Твитер

И досега научниците знаеа дека работата, временските прилики и квалитетот на сонот влијаат на расположението, но ова е прво истражување кое што е направено со помош на некоја од социјалните мрежи.

Истражувачите од Универзитетот "Корнел" во Њујорк истакнуваат дека тоа овозможило прибирање на податоци во реално време. Резултатите од истражувањето се направени врз основа на пораките кои со помош на Twitter ги испратиле 2,4 милиони луѓе од 84 држави од светот и се објавени во магазинот Science.

„Твитер следи речиси се што се случува во животот на луѓето. Типичните, реални и обични конверзации претставуваат огромна дигитална архива", објаснува еден од авторите на истражувањето, Скот Голдер.

За студијата е користен софтвер кој на база на анализираниот текст го следи однесувањето на луѓето. Заклучено е дека пораките кои се пратени во раните утрински часови - пред заминување на работа, и во доцните вечерни, најчесто содржеле зборови кои опишуваат добро расположение.

Спротивно од тоа, во текот на работното време најчесто се користат зборовите како "страв" или "паника", кои укажуваат на лошо расположение.

Се предвидува дека бројот на корисници на социјалните мрежи како Facebook или Twitter ќе биде дуплиран до 2015 година и дека ќе изнесува околу 1,85 милијарди луѓе од целиот свет. Тоа би можело да придонесе кон создавање на незаменлива база за идните научни истражувања на човечкото однесување, сметаат научниците.