Шефовите лесно можат да ви го расипат бракот и тоа без воопшто да се запознаат со вашиот партнер.

Стресот и тензијата што ги предизвикува насилниот шеф, има многу негативно влијание врз бракот на подредените.

"Веројатно тоа е така затоа што малтретирањето на работа ја зголемува тензијата во врската. Тогаш вработениот е помалку мотивиран и тешко воспоставува позитивна интеракција со партнерот и остатокот од семејството", објаснува водачот на студијата Мередит Фергусон од универзитетот Бејлор во Тексас.

Во обид да го откријат вистинскот ефект од насилството на шефовите, нејзиниот тим истражувачи анкетирал 280 испитаници со полно работно време и нивните партнери. Просечното времетраење на врските било 10 години.

Резултатите укажале на тесна врска помеѓу несогласувањата во бракот и дрскиот шеф. Но, колку бил подолг бракот и колку повеќе деца имале испитаниците, толку послабо влијаел мобингот врз нивниот брачен живот.

Како најчести насилнички потези на надредените биле издвоени: истурање гнев врз вработените со подигнат тон, јавно критикување пред другите вработени и суров однос кон подредените.

Една друга пообемна студија спроведена на универзитетот во Торонто, покажала дека речиси половина од 1.800-те испитаници ја носат својата работа дома, што има долгорочно влијание врз нивните семејни врски. Ефектот бил највидлив кај оние со поголем авторитет на работа.

Постојат научни докази и дека мобингот е особено штетен по здравјето на луѓето. Резултатите од неколку други истражувања, покажале дека жртвите на насилни шефови имаат 2,5 пати поголеми шанси да починат во рок од 20 години како последица на хроничен стрес, во споредба со оние кои се изјаснуваат дека работат во горе-долу пријатна средина.