Според едно ново истражување, луѓето го проценуваат квалитетот и квалификациите на психотерапевтите според тоа како изгледаат нивните канцеларии.

Влијанието на оваа перцепција било откирено кога на испитаниците им биле покажани слики од канцелариите на психотерапевтите.

Учесниците во истражувањето потоа ги проценувале терапевтите и им давале високи оцени на оние чии канцеларии биле уредни и во кои имало мали детали како што се перници и килими, а исто така кадешто имало диплома и врамени фотографии.

„Луѓето оценуваат дали еден терапевт е добар или не според неговата канцеларија," – вели Џек Насар. „Без разлика дали станува збор за успешни или неуспешни психотерапевти, клиентите ги проценуваат според изгледот на нивната канцеларија."

Во истражувањето беа вклучени неколку експерименти во кои на луѓето им биле прикажани 30 фотографии во боја од вистински канцеларии на психотерапевти на Менхетен. На сликата биле прикажани бирото на психотерапевтот од перспектива на столот кадешто би седел клиентот.

Се' на се', во истражувањето биле вклучени 242 студенти, од кои 60% посетиле психотерапевт.

Истражувачите не нашле разлика меѓу мислењето на оние кои биле на психотерапевт и оние кои не биле, исто мислење исто така имале и мажите и жените, без разлика на нивната возраст, вели Насар.

Пред да почне истражувањето, 12 дипломирани студенти даваа посебна проценка за секоја од 30те канцеларии според бројни карактеристики како што се уредноста, просторот и нивото на персонализација на самата просторија.

Во првото истражување, студентите требаше да замислат како би изгледала нивната посета на терапевт.

Како што гледале во сликите, требало да ја проценат секоја слика според квалитетот и услугата која би ја нуделе, како и удобноста во самата просторија.

Испитаниците изјавиле дека би се чувствувале многу поудобно во канцелариите кои ги процениле како уредни и каде што имало перници, дипломи по ѕидовите и врамени фотографии. Исто така, нив повеќе им се допаѓале канцелариите кадешто имало меки столови, килими, светилки на бирото и цвеќиња.

Во второто истражување, испитаниците сметале дека уредните и персонализирани канцеларии им припаѓале на поуспешни и поквалитетни психотерапевти.

Во третото истражување, испитаниците гледале фотографии и пишувале кој бил нивниот прв впечаток за тоа каков е психологот кој ја има таа канцеларија. А во последното истражување, испитаниците требало да изберат во која канцеларија би оделе за да разговараат со психотерапевт кога би имале проблем.

„Оние канцеларии кои биле најмногу барани изгледале организирано и меко," – вели Насар. „Испитаниците ги оценувале овие канцеларии како пријатни, фини,чисти, топли и привлечни."

Од друга страна, оние кои биле најдолу на листата биле опишани како затворени, темни, неуредни, непријатни и непрофесионални.

Кога станувало збор за оценување на најлошите канцеларии, испитаниците покажале најголема согласност.

„Луѓето потешко се согласуваат за тоа како треба да изгледа една добра канцеларија, но сите заедно се согласуваат за тоа како треба да изгледа една лоша канцеларија," – вели Насар.

Терапевтите кои работеле во петте најдобри канцеларии се сметале и самите за поорганизирани, попрофесионални, попријателски настроени и поискусни од другите на дното на листата.

Меѓутоа, постоеле разлики кога полот бил земен во предвид, вели Насар. Терапевтите кои се сметале дека имаат најдобри канцеларии од страна на испитаниците биле одредени како мажи, а истите сметале дека најлошите и најнеуредни канцеларии им припаѓаат на жени.

„Овие резултати исто така покажуваат дека луѓето кои посетуваат терапевти чии канцеларии се на дното на листата можеби нема да сакаат да се вратат кај нив уште еднаш."

„Очигледно е дека луѓето ги проценуваат психотерапевтите според изгледот на нивните канцеларии, но исто така откривме дека и нивниот вкус за добра канцеларија варира. Постојат и психотерапевти кои воопшто не се грижат каков впечаток оставаат врз клиентите."

Насар смета дека психотерапевтите треба да ги разгледаат резултатите од испитувањето.

„Психотерапевтите треба да знаат дека нивните канцеларии треба да се отворени и пријатни за клиентите. Нека ги стават дипломите на ѕидот и нека остават личен печат врз канцеларијата. Нека се грижат за уредноста и организацијата во канцеларијата."