Сигурно првичната реакција на ова ви беше „Кој јас? Нема шанси, јас не досадувам", но дали навистина може тоа да го знаете со сигурност?

Некои ваши муабети можат едноставно да не бидат толку интересни за другите луѓе, а тие се само доволно љубезни да ве не прекинат.

Но, ако соговорникот не ве прекинува или не менува тема не значи дека ужива во вашата конверзација, туку може само е доволно културен да не ви укаже колку „замарате", а во себе си прави шопинг листа на намирници.

Ако ве загрижува тоа дали сте и вие меѓу луѓето кои знаат да досадуваат, Гречен Рубин, авторката на бестселерот на New York Times, „Тhe Happiness Projecт" ви нуди седум работи по кои може да сфатите и да избегнете да бидете напорни за другите.

Повторување површни одговори

Ако вие упорно раскажувате некоја приказна, која трае и трае, не само што треба да си претпоставите дека можеби сте напорни, туку тоа ќе го заклучите ако соговорникот повторува површни одговори. Најчести од нив кои покажуваат дека личноста не е баш заинтересирана за вашата приказна се „Леле, нависитина?", „Што зборуваш?", „Интересно" и „Баш е смешно", кажани без доза на емоција.

Едноставни прашања

Луѓето на кои им е досадно, а сакаат да бидат само љубезни (или не знаат како да ве откачат) поставуваат едноставни прашања како „Кога се пресели?", „Каде учеше?". Заинтересираните луѓе поставуваат комплицирани прашања кои откриваат вистинска љубопитност, а не само љубезност.

Прекинување

Можеби е непристојно, но прекинувањето е всушност добар знак. Се' додека личноста ве прекинува со прашања и потпрашања за она што го зборувате, тоа значи дека е заинтересирана за вашата приказна и не и' досадувате. Меѓутоа, ако цело време „нафрла" свои теми или случки, тогаш или е егоцентрик или навистина не ужива во она што го зборувате.

Барања за појаснување

Личноста која е навистина заинтересирана за она што имате да го кажете, бара дополнителни објаснувања, најчесто со прашањата од типот на „Како тоа?", „Што нависитна се случи?". Овие мали потпрашања покажуваат дека соговорникот внимателно ве следи и слуша што зборувате.

Сооднос во зборувањето

Повеќето луѓе мислат дека ако исполнат 80 проценти од зборувањето во конверзацијата, значи дека другите ги сметаат за интересни. Понекогаш е тоа вистина, особено ако „изворот" дава голем проток на информации. Но, генерално, ако луѓето се заинтересирани за темата и тие сакаат нешто да кажат и да допринесат за конверзацијата, да ги споделат своите искуства, мислења и информации. Ако тоа не го прават, веројатно сакаат разговорот да заврши што побрзо.

Ставот на публиката

Ако говорите во јавност, лесно може да забележите дали вашиот говор им е досаден на другите или навистина уживаат да го слушаат она што вие имате да им го кажете. Луѓето кои се навалени на една страна, се подгрбавени или навалени напред најчесто се досадуваат. Степенот на заинтересираност може да се забележи во исправеното држење на публиката.

Говорот на телото

Луѓето со вистинска конекција, претежно се свртени еден кон друг. Личноста која е делумно свртена не е целосно предадена на разговорот. На ова треба посебно да внимавате на работни состаноци, кога сакате да оставите впечаток - на столот седнете свртени напред, наместо да свртете грб на сите и да се насочите кон тој што зборува.

Ако не сакате да добиете епитет во друштвото како „досаден" или „напорен", тогаш обратете внимание на овие работи наредниот пат кога ќе зборувате или раскажувате нешто. Ако забележете барем еден од овие знаци, тогаш е време да прекинете со приказната и да им дадете збор и на другите.