Иако се вели дека во мали дози е препорачлива, еве зошто љубомората е губење време.

Можеби сте имале претходни негативни искуства кои ве научиле дека треба да бидете сомнителни, бидејќи може да завршите повредени или можеби само сте предупредени од бурното минато на вашиот/та партнер/ка, во секој случај постојано сте на "штрек", се сомневате во дневните активности на вашиот/та партнер/ка, а зборувањето со друга жена/друг маж го доживувате алармантно.

Но, постојаните "ѕврцкања" на телефон, редовното проверување на неговиот/нејзиниот Facebook профил и, не дај боже да ви текне, следењето во град, можат многу лесно да ви го окупираат животот, да станете опсесивни, а да не постигнете ништо. Ако сепак сакате да се изборите со ова чувство, ви нудиме да ја погледнете љубомората од еден друг агол.

Љубомората е болна

Ако постојано се грижите за секоја ситница и барате проблеми и каде што ги нема, ќе бидете многу несреќни. Всушност, вашите дневни активности ќе се сведуваат во барање траги дека се оправдани сомнежите што ги имате и ако си го потврдите тоа, ќе бидете несреќни, а и да не си го потврдите, ќе бидете несреќни, верувајќи дека нешто постои, само вие не можете да го видите.

Покрај емоционалната болка, љубомората може да се манифестира и на физички начин. Некои љубоморни жени чувствуваат константни болки во стомакот. Зошто би сакале да се мачите на овој начин? Ако сте се одлучиле да имате врска, треба да знаете дека со тоа сте дале ветување дека ќе му верувате.

Демнењето бара време

Шпионирањето на сите негови/нејзини активности бара многу време, напор и чувство на постојан немир. Една од најопасните манифестации на љубомората е потребата да го/ја демнете - каде и со кого излегува, "чепкање" во неговиот/нејзиниот компјутер, телефон, по џебовите, влегување во пораките на Facebook профилот...

Од ова не може ништо добро да излезе - или ќе си дадете сами себе причина за љубомора или ќе забележите нешто кое иако невино, вас ќе ви изгледа на голема работа, а соочувајќи го/ја со „испадот", само ќе ја откриете вашата природа на „невротична" жена/маж.

Нагласување на предностите на "другата"

Љубомората кај жените кои живеат во постојан страв дека ќе бидат изневерени најчесто потекнува од нивната несигурност, а се манифестира преку споредување со другите жени и прашања од типот „Зошто си со мене, а не со неа? Таа е толку згодна, а јас сум дебела". Но, иако можеби на почетокот ќе изнудите комплименти од партнерот и уверувања дека вие сте неговата избраничка, на крајот можете дури и да го убедите во квалитетите кои ги поседуваат сите останати жени, освен вас.

Претворање во намќор

Честите сомнежи и вашите замислени проблеми само ќе ве направат постојано нерасположени и личност која зрачи со негативна енергија. Вас веќе ништо нема да ви биде смешно, сè ќе ве нервира и ќе сакате до бесвест да се расправате со вашиот партнер/ка, да зборувате за „проблемот" и ќе бидете личноста околу кој никој не би сакал да се наоѓа, а најмалку вашиот избраник/чка.

Не менува ништо

Љубомората и сомнителноста се толку бескорисни активности, бидејќи не менуваат ништо. Ако вашиот партнер сака да флертува со други, тоа ќе го направи, без разлика колку паничите. Ако се решил да ве изневери, повторно ќе го направи тоа, без да забележите. А ако ви е верен како куче, тогаш џабе се грижите.

Вистината е, кога добро ќе размислите, дека љубомората е само губење време и не може да смени ништо во неговото однесување, единствено може само да ве оддалечи. Ако веќе го имате овој проблем, обидете се да бидете малку поразумни и да имате доверба во вашиот партнер. Ако ништо друго, барем за доброто на вашата врска.