Психолозите се сомневаат дека предрасудите имаат корени од потребата за опстанок. Нашите претци морале да ги избегнуваат новодојденците затоа што мислеле дека тие имаат некаква болест.

Истражувањата покажуваат дека ако луѓето се чувствуваат кревки и мислат дека лесно се разболуваат, тие често си создаваат предрасуди кон одредена група на луѓе. Но, едно ново истражување објавено во Psychological Science, покажува дека денес постои модерен начин за да се прекине таа врска.

„Сметаме дека ако успееме да ги оттргнеме овие грижи за болестите, ќе успееме и да ги оттргнеме предрасудите кои се јавуваат како резултат на таквото размислување." - вели Џули Ј. Хуанг од Универзитетот во Торонто. Истражувачите открија дека чувството на сигурност може да се подобри преку вакцинација, а со тоа ќе се намалат и предрасудите што луѓето ги развиваат за одредена група на луѓе.

Истражувачите спроведоа три експерименти. Првите два (направени врз 135 и 26 испитаници) ги анализираа реакциите на луѓето при закана од настинка. За време на првиот експеримент, некои од испитаниците веќе имаа примено вакцина, но не сите. Половина од нив читаа информации за настинката. При вториот експеримент, сите испитаници имаа веќе примено вакцина. И вториот пат исто така читаа за настинката, но на некои од нив им беше кажано и за ефикасноста на вакцината против настинка. Останатите беа информирани само за тоа како функционира вакцината.

Резултатите покажаа дека при првиот експеримент, оние кои добија информации за настинката и за тоа какви последици имаа, а беа вакцинирани, имаа помалку непријателски чувства отколку оние кои не беа вакцинирани. Во вториот експеримент, оние кои беа информирани за ефикасноста на вакцината, покажаа помалку непријателски чувства во споредба со останатите.

„Дури и кога сите се заштитени," - вели Хуанг - „перцепцијата дека се добро заштитени ги брише предрасудите."

Третиот експеримент беше направен врз 26 студенти од кои половина ги избришале рацете и тастатурата од компјутерот со чисто марамче. Останатите не го сториле тоа.

Текстот кој тие го читаа вклучуваше статија за тоа дека анти-бактериските марамчиња спречуваат ширење на зараза. Исто така, биле информирани и за бактериите кои предизвикуваат различни болести. Како што се очекуваше, оние кои не си ги избришаа рацете, веднаш покажаа реакции на незадоволство. Меѓутоа, студентите со чисти раце не изнесоа никакви предрасуди.