Новата година е почеток, и речиси секој ја доживува како добар момент да се сменат работите кои не тиштеле изминатата година.

Тогаш правиме ретроспектива и се договараме со себеси за она што сакаме да го смениме на подобро, но некогаш не треба да се брза, за да не ви тргнат празниците по лош тек. Еве каде треба да бидете внимателни, да почекате некое време, добро да размислите, па потоа да постапите како што треба.

Да предложите да разговарате за врската

Ако не ви се допаѓаат последните случувања во врската, сигурно една од новогодишните одлуки ќе ви биде да го поправите односот помеѓу вас. Но, навистина, дали сакате да ја почнете новата година со заладени односи, искарани и со намрштени фаци? Сега е момент да уживате во празниците, ќе имате цела година да работите на вашата врска.

Да уплатите скапо летување

Сте виделе супер понуди за летување и поттикнати од ладното време, едноставно ви се смачило од студот и сте решиле дека сега е вистинскиот моментот и да уплатите. Но, кога ќе дојде време да ги покриете трошоците, не е сигурно дека сè уште ќе бидете среќни дека сте го направиле овој чекор. Всушност, многу нешта може да се случат до летото, а да го планирате летниот одмор не е најитната работа.

Да дадете отказ преку емаил

Замислете го сценариово: Ви се смачило од работата која ја работите сега, па си велите дека 2012-та ќе ја почнете со поубава работа и работно место и задачи кои ќе ве исполнуваат и нема да го трпите вашиот ѓубре шеф. Понесени од ова чувство, пишувате еден лут емаил и на ден пред нова година стискате „испрати". Ако не сакате новогодишната ноќ да ја поминете загрижени што ќе правите кога ќе помине „лудилото" и ќе треба повторно да се вратите на секојдневните обврски, кои, патем, ќе ги немате, не избрзувајте со давањето отказ.

Да ја средувате облеката

Одлучивте дека е време малку да го средите плакарот полн со облека која не ја носите. И така импулсивно ставате сè во кеси, а потоа, како вистински Дедо Мраз им ги подарувате на вашите братучеди или внуци. Но, кога ќе се вратите дома и ќе требате да облечете нешто за излегување вечерта, ќе сфатите дека избрзано сте се откажале од многу работи кои можат да ви завршат работа во периодот кога сите продавници ќе бидат затворени.

Да позајмите луксузен фустан

Знаете дека во целото новогодишното лудило при таа голема количина на храна, торти, салати или пијалаци, нешто сигурно ќе заврши во вашиот скут, нели? Сигурни сли те дека ќе можете да се забавувате, грижејќи се некој да не ве извалка или мислејќи како ќе се оправдате пред позајмувачот?

Да се качите на вага

Само Нова Година се чекаше, па да почнете со диета или да се запишете на вежбање? Сега не е време за тоа, особено не покрај сите меса, торти, сарми, кифли и руска салата кои ви ги нудат каде и да отидете. Плус тоа, според нашиот балкански менталитет одбивањето храна се сфаќа како навреда. Размислете дали сакате да одите наоколу и да ги „навредувате" луѓето?

Да си ветите дека ќе го оставите алкохолот

Да не се лажеме, после славната руската салата, алкохолот е барем на второ место по работите што ги обележуваат новогодишните празници. Каде и да отидете, ќе ве понудат со добро вино или ракија стара 10 години, а вие нема да можете да одолеете на понуденото. Ако успеете да ја поминете новогодишната ноќ само со сокче, примете најсрдечни честитки.

Да менувате подароци

Сте добиле нешто што е далеку од вашиот вкус, но враќањето подароци после празниците, не е добра идеја. Продавниците се „опустошени" од претходните купувачи, а вие нема да најдете ништо што ви се допаѓа. Најдобро ставете го подарокот на дното од некоја фиока и за следен пат кога ќе одите на роденден, веќе ќе имате подготвен подарок. Само внимавајте да не му го „вратите" подарокот на оној од кој сте го добиле.