Истражувањата покажале дека проблеми со празничната трпеза особено имаат жените.

Тие за време на празниците внесуваат многу повеќе калории отколку што е потребно, не затоа што се гладни, туку затоа што не можат да и одолеат на богатата празнична трпеза. Затоа, имајте на ум неколку практични совети.

Жените, во просек, во текот на новогодишните празници се здебелуваат за два килограми, бидејќи тогаш дневно внесуваат 700 калории повеќе отколку што е потребно за организмот нормално да функционира.

На самиот ден кога ја испраќаме старата година или на Божиќ жените во организмот внесуваат, верувале или не, дури до 3.000 калории! Не, тоа не го прават затоа што се гладни, туку, првенствено, заради тоа што едноставно не можат да одолеат на богатата празнична трпеза.

За ова да не биде случај и со вас, имајте ги на ум следниве неколку совети, кои се разбира важат и за мажите:

Не јадете се и сешто

Немојте да јадете храна која не ја сакате баш најмногу, туку чувајте си место за онаа која ја обожавате и, ако е возможно, за домашната храна без додатоци. Сега е моментот да си покажете себеси со колкав степен на самоконтрола располагате. Утредента полесно ќе соберете сили да кажете 'не' и на обилната храна која преостанала од новогодишната ноќ и која постојано извира на вашата маса. Од посебна важност е да одолеете на грицките и слатките кои никако да се тргнат од масата. Не заборавајте една клучна работа, јадете само тогаш кога сте гладни, а не постојано.

Седнувајте на маса до оние кои јадат мали порции

Ова можеби и ќе ви звучи и смешно, ама кога ќе седнете на празничната трпеза, ако е тоа воопшто возможно, изборете се да седите помеѓу две витки личности. Тие во своите садови ќе ставаат помалку храна, па голема е веројатноста и вие да го правите тоа несвесно. Ја знаете онаа старата „со кој си таков си". Ако тоа и не е баш изводливо, тогаш обидете се самите на себеси да си бидете „контролор" и колку толку да ја игнорирате високо калоричната храна која ви е постојано на дофат.

„Подметнете" здрава храна во нездравата

Подготвувајќи ги јадењата за празничната трпеза обидете се да им додадете 100-150 грама житарки од цело зрно затоа што тие имаат благотворно дејство на цревата. Можете да ги растурите низ салатата или неколку дена порано да ги ставите во млеко, па да ги принесете како додаток за јадењето. Ако се добро „подметнати", никој нема да ви се налути а користа ќе биде голема.