Потребна ви е вашата креативност, но никако да го поминете невидливиот ѕид во главата. Како да ја надминете креативната блокада?

Едно ново истражување направено од Џефри Санџез-Буркс и Сунтае Ким од Универзитетот во Мичиген, покажува дека впуштањето во физичка активност ја зголемува способноста за креативно решавање на проблеми.

„Метафори на креативното размислување кружат во секојдневна употреба," – објаснува Санџез-Буркс, вонреден професор за менаџмент и организации на споменатиот универзитет - „Размислувајте надвор од рамките, разгледувајте го проблемот од една па од друга страна, спојте два со два, па креативноста веројатно ќе следи. Вакви совети се препишуваат многу често во рамки на истражувачките лаборатории, маркетинг тимовите, амфитеатрите во високото образование или во некој друг контекст во кој новиот пристап кон дадениот проблем се цени. Обично метафорите прават врска помеѓу конкретни телесни искуства и креативната когниција."

Санџез-Буркс, заедно со докторантот Ким составиле тим на интернационални истражувачи кои спровеле пет студии со речиси 400 студенти за да ја испитаат психолошката потенција на креативните метафори преку проучување дали креативното решавање на проблеми се зголемува ако луѓето буквално ги следат метафорите.

Студиите се протегале од таква која на испитаниците им задавала задача да генерираат идеи прво држејќи ја испружена десната па левата рака („размислувајте од една па од друга страна"), преку таква која им задавала задачи со зборови кои требало да ги решаваат седејќи во кутија или да решаваат проблеми одејќи по патека која е правоаголна наспроти слободното одење („размислување надвор од рамките") па се до студии во кои спојувале повеќе идеи за да дојдат до решенија додека комбинираат два објекти („спојте два со два").

Во сите 5 студии, наодите покажале дека физичкото и психолошкото отелотворување на креативните метафори допринело за поголема флуентност, флексибилност и оригиналност во решавањето на проблеми.

„Актите на наизменично гестикулирање со секоја од рацете и спојувањето на објекти може да ја зајакнат креативната перформанса. Буквалното мислење вон или без некое физичко ограничување, како што може да се направи при разодувањето надвор или шетањето, може да помогне да се елиминираат несвесните ментални бариери кои ја ограничуваат когницијата." – велат истражувачите.

„Фрламе ново светло врз проблематиката на генерирање креативни решенија со оваа демонстрација дека отелотворувањето на метафорите потенцијално може да го зголеми, а не само активира, репертоарот на знаења, преку предизвикување на нови когнитивни процеси кои се погодни за создавање на креативни солуции. Со други зборови, нашите врски ум-тело сведочат не само за процесите на активација на знаењата, туку и за генерирање на знаења. Отелотворувањето на креативните метафори изгледа дека помага во стартувањето на моторот на креативност" – завршуваат истражувачите.