Иако мобилните телефони обично се сметаат за уреди кои ги поврзуваат луѓето, тие може да ги направат корисниците помалку социјално свесни.

Ова го тврди една нова студија направена од Анастасија Почепцова и Розалина Фераро од Универзитетот во Мериленд, САД. Тие направиле серија експерименти на групи корисници на мобилни телефони. Наодите од оваа студија се објавени во работниот извештај насловен „Ефектите од употребата на мобилните телефони врз просоцијалното однесување".

Просоцијалното однесување тие во својата студија го дефинираат како намерно поведение кое е насочено да и користи на некоја друга личност или на општеството во целина.

Истражувачите дошле до сознание дека после краток период од употребата на мобилен телефон испитаниците биле помалку расположени да се пријават за доброволна општествена работа кога тоа било побарано од нив, споредено со контролната група на испитаници.

„Телефонџиите" исто така биле помалку упорни во решавање на јазични загатки – иако им било кажано дека нивниот точен одговор ќе значи парична донација за добротворна организација.

Намалената насоченост кон другите се покажала како факт дури и кога овие испитаници биле замолени само да нацртаат слика од сопствениот мобилен телефон и да размислат како го употребуваат.

Во студијата биле вклучени посебни групи на студенти – машки и женски главно во нивните дваесетти години од животот. „За очекување се вакви резултати да се покажат и кај луѓе од други возрасни групи. Ако ја имаме во предвид первазивноста на мобилните телефони, оваа појава има потенцијал да има широки општествени импликации." – изјави Фераро.

Авторките цитирале некои претходни истражувања на оваа тема при нивното објаснување на причините за овие наоди: „Мобилниот телефон директно побудува чувство на поврзаност со други луѓе, исполнувајќи ја на тој начин базичната човечка потреба да се припаѓа некаде." Како последица на ова, се намалува потребата за дополнително поврзување со другите во емпатично или просоцијално однесување.

Оваа студија исто така во еден од зададените тестови прави разлика меѓу своите испитаници и корисниците на други социјални медиуми – како Фејсбук на пример. Истражувачите утврдиле дека учесниците се чувствувале повеќе поврзани со другите при употреба на мобилен телефон отколку при употребата на Фејсбук, што дава за право да се заклучи дека оваа разлика во чувството на поврзаност е движечки фактор на набљудуваната појава.

Авторките на оваа студија сега ги испитуваат и ефектите на останатите социјални медиуми и технолошки достигнувања врз просоцијалното однесување, а вие размислете како се чувствувате по употребата на вашиот мобилен телефон, поповрзани или пооделени од другите луѓе околу вас.