Имињата кои полесно се изговараат си носат суптилна предност во животот.

Имено, според една студија која ја анализирала изговорливоста на имињата и како таа влијае врз формирањето на впечатоци и носењето одлуки, колку поизговорливо име имате, толку е поверојатно дека ќе напредувате на работа, ќе имате успешна кариера во политиката или ќе бидете успешен професионалец во областа со која се занимавате.

Австралискиот психолог Др. Сајмон Лахам од Универзитетот од Мелбурн, заедно со своите колеги под негово водство ги соопшти резултатите од нивната студија објавена во Журналот за Експериментална Социјална Психологија, според кои луѓето не секогаш се свесни за суптилната пристрасност која им ја даваат на оние со поизговорливи имиња.

Оваа студија всушност се надоградува на онаа на Адам Алтер од Њујоршкиот Универзитет за Бизнис, кој патем е и коавтор на студијата направена во Австралија. Во неговата, Алтер пронашол интересни наоди дека финансиските акции со поедноставни имиња имале поголем успех на берзата веднаш по нивното појавување отколку акциите со посложени имиња.

За новава студија, истражувачите работеле како во лабораторија така и на терен, во природни околности, употребувајќи имиња од Англо, Азиско, Западно Европско и Источно Европско потекло.

Дошле до сознание дека суптилниот ефект кој го има името „не е заради неговата должина или дали на некого му звучи како странско име или необично, туку колку лесно е за изговарање," изјави Лахам.

Од нивните испитувања јасно се покажало дека:

• Кандидатите кои имале поизговорливи имиња биле многу пофаворизирани за добивање на унапредување во работата или политичко место.
• Во симулирани избори, политичките кандидати чии имиња биле полесни за изговарање се покажало дека имаат поголеми шанси за победа отколку нивните соперници чии имиња било потешко да се изговорат.
• Адвокатите со имиња полесни за изговарање напредувале многу побрзо до главните позиции во нивните фирми.

Алтер направил анализа на адвокатски фирми, која опфатила 500 имиња и презимиња на Американски адвокати. Тој вели дека ефектот веројатно важи и за сите други области, но и во други околности од секојдневието.

„Луѓето едноставно не се свесни за суптилното влијание кое имињата може да го имаат врз нивното расудување" – рече Алтер.

„Оваа студија ја демонстрира потенцијата на процесирањето на флуентноста во контекст богат со информации врз формацијата на импресии" – напишаа авторите во својот извештај.

Лахам смета дека ова истражување, иако прво од ваков вид, е важно бидејќи покажува дека постои суптилна пристрасност и дискриминација на работа и во општеството. Важно е да се сфати како ова ни ги обликува изборите и расудувањата за другите.

„Ако го имаме ова во предвид тогаш тоа ќе ни помогне да ја оттргнеме пристрасноста во нашето размислување, што ќе води до пофер, пообјективно однесување кон другите" – апелира Лахам.