Припадниците на амазонското племе Пираха немаат зборови за броеви! Тие не бројат како што тоа го правиме ние.

Мало племе на ловци/собирачи кои живее во Амазонската дождовна шума побива некои фундаментални претпоставки за човековиот начин на размислување. Иако лингвистите долго време веруваа дека користењето на зборови за броеви и броењето се основни, ако не вродени, за човековото спознавање, припадниците на племето Пираха во Бразил немаат зборови со кои можат да ги означат бројните поими како "еден", "два" или "многу". Тие не бројат и немаат зборови за броевите, вели Едвард Гибсон, научник на MIT, кој ја предводеше студијата објавена во списанието "Сознание".

Истражувачите беа осум дена во селото на Пирахите со цел да спроведат тестови за броење врз возрасните членови на племето. Понекогаш експериментаторот ставаше на маса различен број на клопчиња од жица, а учесникот во експериментот требаше да стави исто толкаво количество на ненадуени балони. Друга задача се состоеше во тоа субјектот да се присети колку клопчиња од жица беа претходно ставени во канта.

Претходна - и побиена - студија извршена врз Пираха племето тврдеше дека тие ги користат зборовите "hói, hòi, и baágiso" за соодветно означување на "еден", "два", и "многу". Но тестотите на Гибсон открија дека Пирахите ги користат овие зборови на порелативен начин за да означат "малку", "нешто/некои", и "повеќе". Во некои случаи "hói" се користеше за количество од 6 предмети, а некогаш "hòi "- сличен збор, но со различно значење - се користеше за да изрази количество помеѓу 4 и 10. "Ниеден од трите збора Пирахите не го користеа за постојано именување на некое одредено количество," објавија истражувачите.

Гибсон вели дека неговиот тим планира да спроведе уште една студија, овојпат врз децата од Пираха племето. "Би сакале да ги тестираме", вели тој, "но може да биде тешко да се добие дозвола за повторно враќање во селото. Доколку можеме да се вратиме, ќе го сториме тоа."