До 20% од пациентите кои се лечат од депресија се чувствуваат полошо отколку оние кои наместо антидепресиви пијат плацебо терапија, предупредуваат американските стручњаци од Медицинскиот факултет при Универзитетот Јејл.

Тие ги анализирале резултатите на седум студии, со кои биле опфатени 2.500 луѓе со силна депресија. По случаен избор бил одбран дел од пациентите кои примале лек против депресија, додека останатите добивале плацебо терапија.

Испитаниците кои биле ставени на плацебо терапијата пријавувале генерално мал, постапен напредок кон ублажувањето на симптомите на депресијата, додека меѓу пациентите кои навистина пиеле антидепресиви имало значителна поларизација.

Кај повеќето од лечените пациенти, односно 84%, воочено е прогресивно ублажување на симптомите на депресија, додека кај останатите состојбата не се менувала.

Тие 16% фактички биле во полоша ситуација отколку оние кои пиеле плацебо таблети бидејќи, без никакво подобрување на депресивните симптоми, биле изложени на несакани нус-ефекти на антидепресивите, како што се стомачните проблеми и проблемите со сонот.

Тимот од Јејл сугерира дека докторите веќе во првите недели од лечењето може да препознаат кои пациенти не реагираат на лековите.

Некои нови истражувања се обидуваат да идентификуваат генетски и други фактори и симптоми, кои однапред би укажале на тоа кои медикаменти не би биле ефективни кај одредени пациенти.

"Тоа би бил огромен напредок на ова поле", вели Др. Хендрикс Браун, стручњак за лечење депресија од Универзитетот во Мајами.