Понекогаш природата креира симптоми блиски или речиси идентични со оние на бременоста кај жените предизвикувајќи состојба на лажна бременост.

Стручниот термин за оваа состојба е псевдоциеза, а кај психолозите и психијатрите е позната и под терминот „хистерична бременост". Присутни се многу од знаците и симптомите на бременост и речиси се укажува на тоа со исклучок на присуството на фетус. Симптомите на ова психичко нарушување се слични на симптомите на вистинската бременост и често пати е тешко да се постави диференцијална дијагноза се до моментот на конечно утврдување на присуство, односно отсуство на фетус.

Оваа состојба и не е толку ретка како што може на прв поглед да се помисли, а не е карактеристична само за жените туку се јавува и кај женките на некои други видови цицачи, особено кај кучињата и глувците.

Засега нема универзална теорија за тоа што ја предизвикува оваа состојба. Една од теориите тврди дека причината за лажната бременост е емоционалниот конфликт кој се одвива кај жената. Се смета дека интензивната желба да се остане бремена, или пак интензивниот страв од бременост, може да создаде внатрешни конфликти и промени на ендокриниот систем до таа мера што таа ќе покаже речиси јасна симптоматологија на бременост.

Статистички најчесто ваквата појава е забележана кај жени во нивните триесетти и четириесетти години од животот. Воглавно, се работи за мажени жени со голема желба да забременат. Во ваквите ситуации се претпоставува дека фактор е разочарувањето што не забременуваат кое има силна емоционална поддршка на потсвесно ниво да резултира во реална промена на ендокрината слика придружено со екстерна манифестација на симптоми на бременост.

Според едно друго гледиште жените кои очајно сакаат да останат бремени, може да ги интерпретираат промените на своето тело како знаци за бременост. Ова обично се случува ако жената била веќе еднаш бремена но го изгубила плодот со спонтан абортус.

Има и погледи според кои депресивната состојба на жената е главниот причинител. Самата депресија може да направи хемиски промени во нервниот систем кои може да ги поттикнат симптомите на псевдоциезата.

Една работа што е заедничка за сите случаи на лажна бременост е менталната состојба кај жените со вакви симптоми. Таа секогаш е со длабок емоционален конфликт, разочарување или депресивна конотација. Карактеристично е што во сите случаи жените имаат многу силно верување дека навистина се бремени.

Иако екстерните симптоми може да залажат, оваа состојба всушност многу лесно се дијагностицира, со обичен клинички тест за бременост или ултразвук на пример. Но, без оглед како ќе се дијагностицира, јасно е дека клучот лежи во психолошкиот фактори и потребен е соодветен психолошки третман и терапија, иако во многу случаи жените добиваат медикаменти за симптомите. Како и за голем број други состојби, потребна е пред се поддршка и разбирање од најблиските.