Нова канадска студија предупредува дека во популарните женски списанија не се обрнува многу внимание на последиците од естетската хирургија врз емоционалното здравје.

Истражувачите од Универзитетот на Британска Колумбија велат дека натписите во женските списанија како "The Oprah Magazine" и "Cosmopolitan" ја прикажуваат пластичната хирургија како физички ризична, но сепак вредна опција за подобрување на физичкиот изглед и емоционалното здравје.

Студијата, објавена во списанието "Women’s Health Issues" е прва која испитува како женските списанија им ја претставуваат пластичната хирургија на Канаѓаните. Таа исто така открива дека машките мислења за женската привлечност постојано се користат за да се оправда естетската хирургија и дека непропорционален број на текстови се посветуваат на темата силикони и пластична хирургија за жените на возраст од 19 до 34 години.

"Покрај убавината, облекувањето и советите за диета, женските списанија ја претставуваат естетската хирургија како нешто нормално што се практикува со цел да се зголеми или одржи убавината, да се стане поатрактивна за машкиот пол и да се подобри емоционалното здравје," вели Андреа Полонијо, која го спроведуваше истражувањето на Универзитетот Беркли во Калифорнија како дел од почесната теза на Одделот по Социологија.

Полонијо, сега дипломирана на Дала Лана Школото за Јавно Здравје при Универзитетот во Торонто, истражуваше како петте најпопуларни Канадски женски списанија на англиски јазик - Chatelaine, Cosmopolitan, O: The Oprah Magazine, Flare и Prevention - ја прикажуваат естетската хирургија. Студијата се фокусираше на 35 натписи објавени помеѓу 2002 и 2006 година.

"Списанијата укажуваат повеќе на физичките ризици од пластичната хирургија отколку на ризиците по емоционалното здравје," вели Полонијо, забележувајќи дека студиите откриле како анксиозноста и депресијата се појавуваат или се зголемуваат кај жените кои имале успешна пластична операција, без оглед на нивната емоционална состојба пред операцијата.

Од натписите кои го споменуваат емоционалното здравје, само 18% укажуваат дека естетската хирургија може да биде штетна за емоционалната добросостојба, дознава студијата.

Според студијата, списанијата постојано презентираат две "идеални" кандидатки за пластични операции: Несреќна, несигурна и осамена жена која бара начин да си ги подобри самопочитта и самодовербата, и успешна, атрактивна, сигурна жена со високо ниво на самодоверба која ја користи естетската хирургија со цел да го одржи совршенството.

"Овие два профила претставуваат екстреми од широк спектар на ставови, за кои повеќето жени велат дека се препознаваат некаде помеѓу," вели Ричард Карпијано, професор по социологија на Универзитетот Беркли и ко-автор на студијата.

"Ова потенцијално и овозможува на естетската хирургија да биде презентирана како опција за многу жени без оглед на нивната емоционална состојба пред операцијата."

Во натписите за естетската хирургија машките размислувања беа често земани во предвид, а  во 29% од нив се расправа за тоа какво влијание има женската пластична хирургија врз машката популација.