Следниот пат кога вашиот партнер или партнерка ќе ви кажува едно, а вам буквално ви мириса на нешто друго, знајте дека голем е процентот на веројатност да сте во право. Познатата изрека „овде нешто ми мириса на лага", добива сосема нова перспектива.

За двојките кои се долго време заедно велат дека веќе почнуваат дури и физички да наликуваат еден на друг. Се наметнува само по себе дека би требало добро да се разбираат, само со поглед или гест и без да си речат збор. Но, дали сте помислиле дека може само да се помирисаат и веднаш да знаат што оној другиот чувствува?

Од ваква претпоставка тргнала и Дениз Чен, психолог од Рајс универзитетот во САД. Таа со својот тим подготвила експеримент во кој биле испитувани 20 двојки. Времетраењето на нивните врски било од една до седум години во моментот кога е изведен експериментот. Акцентот бил ставен на чувствата на страв, среќа и сексуална возбуда. Што направил тимот на Чен за да ги испита своите претпоставки?

На испитаниците им прикажувале видео материјали кои кај нив требало да предизвикаат реакции на страв, среќа или пак сексуална возбуда, а покрај тоа им прикажувале и видеа со неутрална содржина кои не предизвикувале некоја посебна реакција. Под пазувите им ставиле влошки кои им ја собирале потта за секое видео, односно реакција посебно. Ова било направено со сите испитаници. Влошките ги сместиле во посебни контејнери налик на тегли, за секоја ситуација посебно, вклучително и за неутралните видеа.

Потоа, на секој од доброволците им било дадено да помирисаат тегла со пот кога била предизвикувана одредена емоција кај некој испитаник, а потоа тегла каде се содржела потта која била собирана при гледањето на неутралниот видео материјал.

Треба да се напомене дека хемиските супстанции кои биле предмет на истражувањето а ги лачи нашето тело при одредена емоционална состојба немаат нужно одреден мирис, но сепак може да пренесуваат информација која може да ја детектира мозокот на некој друг, со помош на сензорниот апарат, дури и на несвесно ниво. Многу често овој факт се меша со некоја натприродна екстрасензорна способност, налик на шесто сетило, дека може да осетиме како некој се чувствува.

Резултатите од експериментот покажале дека во речиси две третини од случаите, испитаниците ја соопштиле соодветната емоција на својот партнер, кога ја помирисале теглата во која се наоѓала влошката со примерок од нивна пот за време на гледање на видео што требало да индуцира некаков вид реакција. И тоа, оние двојки кои најдолго биле заедно, биле најуспешни во погодувањето.

Според истражувачите, партнерите не само што може да си ги помирисаат емоциите, туку може преку мирисот и да ги осетат своите партнери ако тие се во нивна близина а не ги гледаат.

Кога се однесува пак, за непознати, процентот во кој испитаниците успевале да погодат за каква емоција се работи паднал на помалку од педесет проценти. Некои битни разлики околу тоа дали поуспешно ја погодувале некоја емоција од друга, немало. Слични биле резултатите и за стравот и за чувството на среќа а и за сексуалната возбуда.

Ова истражување јасно покажува дека, како што првично и претпоставиле Чен и нејзиниот тим, може само да го мириснете вашиот партнер или партнерка и да знаете што чувствуваат. И тоа, колку подолго сте заедно толку поточна ќе биде вашата претпоставка. Се потврдува дека двојките комуницираат на повеќе нивоа отколку што обично се мисли.