Дали сте некој кој со леснотија го препознава секој што го сретнал? Или можеби имате тешкотии, дури и со познато лице?

Сите знаеме, а и покажано е со истражувања, дека сме многу подобри при препознавање на луѓето кои се иста раса со нас, но што е со другите? И како всушност се одвива тој процес на препознавање?

Истражувачите од неодамна се зафатија посериозно со овој проблем, како ги асимилираме информациите кои ни се потребни за да препознаваме. Едно истражување на Универзитетот во Нотингем, кое се одвиваше во Малезискиот Кампус, покажа дека , кога се работи за препознавање на луѓе, малезиските кинези се вистински махери во тоа, со оглед дека морале да ја адаптираат својата техника на препознавање живеејќи во една мултикултурна средина.

Истражувањето било предводено од Кристал Тан, кој изјавува: „Нашето истражување покажа дека малезиските кинези применуваат уникатна шема на гледање која е различна како од западњаците така и од кинезите кои живеат во Кина, најверојатно заради тоа што живеат во мултикултурна земја".

Способноста да се препознаваат различни фаци може да има социјални и еволутивни предности. Човечкото лице обезбедува низа витални информации за идентитетот на личноста која ја гледаме. Меѓу другото, карактеристики како што се пол, возраст, здравствена состојба или пак привлечност. Иако сите имаме горе долу слични основни контури, имаме и наши уникатни обележја кои не разликуваат од другите, а постои јасен доказ дека во мозокот има специјализирани ментални модули кои се посветени исклучиво за таа намена, да препознаваат лица.

Техники на препознавање

Претходните истражувања со слична популација, беа направени од група истражувачи од Универзитетот во Глазгов, Шкотска. Тие покажаа дека кинезите од Кина, употребуваат повеќе холистички техники за препознавање од западњаците.

• Кинезите се фокусираат на централниот дел на лицето во околината на носот
• Западњаците се фокусираат на триаголна зона помеѓу очите и устата
• Кинезите родени во Британија ги користат и двете техники, иако не истовремено, или се концентрираат на триаголната зона или пак на делот околу носот

Кристал вели:„Традиционално се мисли дека луѓето ги препознаваат лицата со наизменично гледање на секое око и потоа устата. Ова претходно истражување ни покажа дека некои азиски групи се концентрираат на централниот дел на лицето, околу носот. И додека западњаците учат како изгледа секој посебен дел на лицето – стратегија која може да биде корисна во популации каде има драматични варијации на бојата на косата и очите, кинезите од Кина употребуваат поглобална стратегија, употребувајќи информации за тоа како се наредени цртите на лицето. Од друга страна пак, кинезите родени во Британија, употребуваат една мешавина на двете техники која укажува на способност за препознавање на лица од други раси, нешто што им ја зголемува способноста за препознавање воопшто."

Техника на следење на очите

Нотингемската студија си постави за цел да истражи дали изложеноста и познавањето на други култури има влијание врз нашата точност при препознавањето и стратегиите на движење на очите.

Тимот искористи технологија специјализирана да го следи движењето на очите за да истражи кои се визуелните стратегии кои се употребуваат при препознавање на лица на фотографии. Учествуваа 22 малезиски кинези, доброволци од малезискиот кампус на Нотингем универзитетот. Резултатите покажаа дека малезиските кинези, употребуваат уникатна стратегија, која е некаква мешавина, фокусирајќи се повеќе на очите и носот отколку на устата.

Кристал изјави: „Покажавме дека малезиските кинези применуваат уникатни модели на гледање кои се разликуваат и од западњаците и од кинезите од Кина. Оваа комбинација на источни и западни техники на гледање се покажа како предност на малезиските кинези при точното препознавање како на кинеските така и на лицата на белците."

Оваа студија беше под надзор на Др. Иан Стефен, експерт за процесирање на лица и Др. Елизабет Шепард, експерт за следење на движењето на очите. Тие изјавија: „Ние сметаме дека луѓето учат како да препознаваат лица во зависност од лицата кои ги среќаваат. Иако Малезија е Источно Азиска земја, нејзиниот етнички состав е прилично различен. Комбинираната стратегија на гледање која ја употребуваат малезиските кинези им дозволува да препознаваат лица на западњаци исто толку добро колку што препознаваат азијати."