Дали ќе бидете популарни во вашето друштво или не, зависи од вашите генетски предиспозиции.

Сите земаме здраво за готово одредени акспекти од нашето социјално однесување – дали лесно се впуштаме во разговор со странци на забава, или пак се "дружиме" со ѕидовите. Знаеме дека таквото однесување е под влијание на генетиката. Но неодамна истражувачите од Универзитетот во Калифорнија и од Универзитетот во Сан Диего открија дека гените имаат и тоа како големо влијание врз видот на социјалните  мрежи кои ги формираат луѓето и какво ќе биде  нивното место во нив.

Џејмс Фаулер, политички научник од Универзитетот во Сан Диего и неговите колеги проучуваа социјални мрежи на 1100 адолесцентни братски и идентични близнаци. Колку пати секој тинејџер беше именуван од другите како пријател и колкава беше веројатноста дека пријателите на едниот се познаваа со пријателите на другиот, 50% зависеше од генетски фактори. Дали тинејџерот беше во центар на мрежата или на периферијата во 30% зависеше од генетиката.

"Ние имаме вродени карактеристики кои ни даваат тенденција да гравитираме кон еден дел од мрежата," објаснува Фаулер. "Варираме во тенденцијата со која ќе ги привлечеме останатите да ни бидат пријатели, а воедно варира и нашата тенденција да ги запознаваме нашите пријатели едни со други." Генетската основа откриена во студијата, вели тој, е веројатно широка комбинација на гени кои се во поголема мерка поврзани со лични карактеристики како хумор, великодушност или екстровертност.

Фаулер и неговите ко-автори покажаа претходно дека карактеристиките и однесувањето поврзани со здравјето, како прекумерната тежина и пушењето, се чини дека се прошируваат низ социјалните мрежи. На пример, кај луѓето чии блиски пријатели се здебелиле поголема е веројатноста дека и тие ќе добијат неколку кила плус. Сега кога истражувачите покажаа дека социјалните мрежи имаат генетска компонента, се префрлаат на решавање на следното прашање: Дали е можно одредени гени кои се поврзани со прекумерната тежина да не влијаат директно врз телото, туку врз структурата на нечија социјална мрежа, со тоа што ги зголемуваат шансите на одредена личност за здебелување? "Социјалните мрежи можат да бидат проводник низ кој дејствуваат гените," вели Фаулер. "Ова е прилично голема и шпекулативна хипотеза, но ова е првиот чекор."