Проценките што ги имаме за интимноста за врската на другите парови се под влијание на серотонинот, откри едно истражување од Универзитетот во Оксфорд.

Здрави и возрасни доброволци, чие ниво на серотонинска активност беше намалено, даваа проценки за парови од фотографии и ги оценуваа како помалку “интимни” и помалку “романтични” отколку оние со нормална серотонинска активност.

Резултатите ја зголемуваат можноста да се верува дека намалената серотонинска активност кај луѓето со депресија и други психијатриски состојби може да го промени начинот на перцепирање на сопствената врска.

„Серотонинот е многу важен во социјалното однесување, меѓутоа, исто така игра голема улога и кај психолошките нарушувања како што е депресијата,“ – објаснува професор Роберт Роџерс од одделот за психијатрија на Универзитетот во Оксфорд. „Сакавме да видиме дали серотонинската активност влијае врз проценките што ги правиме за блиските врски меѓу луѓето.“

„Проблеми со социјалните врски и чувство на социјална изолација се знаци на депресија кај некои луѓе. Се смета дека некои промени во мозочниот систем, како на пример серотонинот придонесуваат да се јават ваквите проблеми со менувањето на начинот на кој луѓето размислуваат за врските со нивните партнери.“

Ваквото сфаќање е битно бидејќи блиските врски служат како заштита при добивањето на ментални болести а исто така се добар лек при закрепнувањето од таквите психијатриски состојби. Меѓутоа, и спротивното е исто така точно: лошите врски можат да го зголемат ризикот за добивање на некоја од овие состојби.

Тимот од Оксфорд, заедно со нивните колеги од Универзитетот во Ливерпул и King’s колеџот од Лондон, ја контролираа серотонинската активност кај здрави и возрасни доброволци, а потоа ги замолија да ги дадат нивните проценки за неколку парови од фотографиите што им ги покажале.

Притоа, на две групи им дадоа пијалоци со амино киселина. Една група доби пијалоци кои содржеа триптофан – амино киселина од која се создава серотонинот во мозокот. Другата група доби пијалоци кои не содржеа триптофан. Разликите во проценките кај двете групи ја покажа разликата од серотонинската активност во мозокот.

Дваесет и двајцата доброволци кои пиеја триптофан, ги проценија паровите од фотографиите како помалку “интимни” и помалку “романтични” отколку деветнаесетте испитаници кои не примија триптофан.

„Иако станува збор за мало истражување, начинот на кој ги оценуваме врските ќе е ист,“ – вели професорот Роџерс. „Серотонинската активност може да влијае врз способноста на луѓето во депресија да ја подобрат нивната состојба и да развијат поинтимни лични врски.“