Едно истражување вели дека нашиот мозок различно реагира кон другите во зависност од тоа како гледаме на нивниот статус.

Истражувањето открива дека луѓето кои на себе гледаат како на луѓе со висок статус имаат поголема мозочна активност отколку оние кои се сметаат за еднакви со другите.
Истражувачите велат дека ова однесување е одредено според тоа како луѓето гледаат на другите во нивната околина.
Еден британски експерт вели дека првите проценки биле клучни при одредувањето на тоа како луѓето меѓусебно се поврзуваат.
Уште од одамна истражувањата покажуваа дека и мајмуните се однесуваат на ваков начин: го менуваат сопственото однесување во однос на тоа како гледаат на останатите во групата.

Дваесет и тројцата испитаници кои имале различен социјален статус, примале информации за луѓе со повисок и понизок статус.
Тимот на истражувачи користел магнетна резонанца за да ја измери активноста на пределот на мозокот задолжен за наградување.
Луѓето кои себеси се сметале за членови на општеството со повисок социоекономски статус покажале поголема мозочна активност кога слушале за луѓето кои биле со повисок социјален статус, додека пак оние со понизок статус повеќе реагирале кога слушале за лицата со понизок социјален статус.

Први проценки

Доктор Каролина Зинк од Националниот Институт за ментално здравје на САД, вели: „Начинот на кој комуницираме и се однесуваме со луѓето многу често е предодреден од нивниот социјален статус, па затоа, податокот за социјалната положба на луѓето за нас претставува важен податок.“
„Исто така, вредноста што им ја даваме на луѓето според нивниот социјален статус зависи од нашиот сопствен социјален статус.“
Таа додава дека социоекономскиот статус не се базира само на парите, туку може да вклучува и фактори како што се постигнувањата и навиките на луѓето.

Доктор Џејн Мекартни, психолог и член на Британската асоцијација за психологија, вели: „Првите проценки се навистина важни за секој, без разлика дали станува збор за статусот, изгледот или парите.“
„Тука станува збор за тоа како решаваме дали една личност има ист статус како нас, и што треба да направиме ако знаеме дека имаме ист статус и како да процениме каква улога би играле тие во нашиот живот.“