Срамежливоста е карактеристика која ја имаат сите луѓе. Сепак, за некои ова може да стане пречка за правилен и здрав живот.

Дали некогаш сте се нашле на улица полна со луѓе и сте помислиле дека сите гледаат во вас и размислуваат за вас? Дали избегнувате да јадете во јавност затоа што се срамите да јадете во друштво на други луѓе? Дали некогаш не сте заминале на училиште затоа што требало да држите говор пред сите само затоа што се срамите, црвенеете и чувствувате дека колената ви се тресат и сите тоа можат да го забележат? Епа тогаш, можеби страдате од социјална вознемиреност.

Дефиниција

Нарушувањето кое се јавува поради социјалната вознемиреност (Social anxiety disorder (SAD)) е нарушување при кое една личност чувствува прекумерен и неразумен страв во социјални ситуации. Овие лица чувствуваат вознемиреност на дневна база и се повлекуваат во себе со цел да избегнат ситуации во кои би биле усрамени.
Ако не се лечи правилно, оваа појава може да влијае врз многу аспекти на животот на човекот, како што се работата, школото и врските. Оваа појава е трета на листата на ментални нарушувања после депресијата и алкохолизмот. Скоро 19, 2 милиони луѓе се борат со оваа болест.

Симптоми на социјалната вознемиреност:

- црвенеење
- прекумерно потење
- треперење
- побавно функционирање
- болки во стомакот
- побрза работа на срцето
- нагон за повраќање
- дијареа

Ситуации во кои се јавуваат овие симптоми:

- држење јавен говор
- јадење во јавност
- користење на јавен тоалет
- забави и други друштвени собири
- поставување прашања на час

Причини за појава на социјална вознемиреност

Иако не постои една главна причина за оваа појава, се смета дека гените и самата околина играат голема улога при развојот на ова нарушување. Бидејќи ниту едно ментално нарушување не се појавува само по себе, ова нарушување повлекува и болести како што се клиничката депресија, генерална вознемиреност и прекумерна употреба на опојни супстанции. Употребата на лекови и опојни супстанции е чест проблем затоа што овие луѓе сметаат дека можат сами да си помогнат ако земаат дрога или алкохол затоа што можат да им помогнат за полесна интеракција со другите.
Факторите на околината исто доведуваат до појава на социјална вознемиреност, затоа што луѓето често доживуваат да бидат исмеани или понижени од другите. Децата пак кои биле под голема заштита од своите родители можат да се здобијат со оваа болест во понатамошниот живот како резултат на неразвиените социјални вештини.

Лекување на нарушувањето поврзано со социјалната вознемиреност

Како и кај секое ментално нарушување, терапијата која вклучува когнитивно однесување преку “разговор” комбинирана со медикаменти е најдобриот лек за подобрување на животот кај луѓето што страдаат од оваа болест. Практикувањето реални општествени ситуации со професионалец во кого имате целосна доверба може многу да помогне при ослободувањето од срамот кај овие лица. Лековите против вознемиреност и депресија исто така можат да помогнат.
Социјалната вознемиреност е тежок проблем кој може да претставува пречка при извршувањето на дневните обврски. Препознавањето на проблемот е првиот чекор кон негово решавање.