Некои лидери за себе ќе речат дека се подобри во војна а некои во мир. Дали навистина може да се направи таква дистинкција, дали постојат лидери за војна и лидери за мир?

Научниците од Универзитетот во Амстердам открија дека може да се направи. Се чини дека времињата на војна бараат различен тип на лидер, отколку времињата на мир. Во најновиот број на PLoS ONE, тим од истражувачи, предводени од Брајан Списак и Марк Ван Вугт, тврдат дека постои биолошки базирана хормонална врска помеѓу лидерското однесување и соодветните фацијални карактеристики. Изненадувачки, ова не се однесува на реалниот биолошкиот пол, туку на машките или женските карактеристики од важност за еден лидер да биде избран како добар воин или добар мировник.

Ограничувачко стереотипизирање

„Им покажавме на нашите 118 испитаници четири видови на лица: мажествено-машко, женствено-машко, мажествено-женско и женствено-женско. Последователно, ги прашавме луѓето за кого би гласале на следните претседателски избори да биде нивен лидер за време на војна и за време на мир. Пронајдовме дека и жените и мажите беа одбирани подеднакво за време на војна и за време на мир, но луѓето значително повеќе преферираа лидери со мажествени црти на лицето за времето на војна а со поженствени за времето на мир без оглед на биолошкиот пол.

Ова не стави во подлабоко размислување за тоа како ги класифицираме половите воопшто. Едноставното класифицирање на луѓето како маж или жена е многу ограничувачко и води до непотребни стереотипи и очекувања. Исто така, покажавме дека овој тип на мажествено-женствена класификација функционира во Азија (со азиски лица) што води до заклучок дека е поприроден и поточен начин на прототипирање – отколку стереотипизирањето – на индивидуите ширум различните култури." – изјави Брајан Списак.

Хормоните

Хормоните како што се тестостеронот и естрогенот се поврзуваат со фацијалните карактеристики и однесувањето. Повисоко ниво на тестостерон го прави лицето да изгледа помажествено (погусти веѓи, потенки усни, поширока вилица) и исто така стимулира однесување кое е потипично за воени услови, насочено кон доминација.

Контрастно на ова пак, естрогенот се поврзува со поженствените карактеристики на лицето како што се полни усни, широки очи и потенки, позаоблени веѓи како и однесување кое се асоцира со мировното.

Дури и дете може да предвиди

„Нашето истражување покажува дека војната и мирот бараат различни лидерски прототипи и дека суптилните фацијални знаци на потенцијалните лидери помагаат да се утврди дали ќе бидат перципирани како адекватни за дадената работа.

Со ова може да се објаснат некои претходни истражувања кои покажале дека дете, дури и од пет годишна возраст, може да предвиди каков ќе биде исходот на реалните политички избори само со тоа што ќе ги погледне кандидатите.“ - рече Списак.