“Еротскиот капитал” е обична ама моќна стока што чини исто колку и образовните квалификации на пазарот на труд - покажува истражување на социолог од Лондонската школа за економија.

„Убавината и сексуалната привлечност стануваат се поистакнати карактеристики на личноста во денешните либерални и модерни општества, дотолку што понекогаш се израмнуваат со образовните квалификации, “ – вели доктор Кетрин Хаким, автор на истражувањето. Нејзиниот труд беше објавен во European Sociological Review.

Таа го измисли терминот “еротски капитал” за да ја објасни комбинацијата на физичка и социјална привлечност која ги прави луѓето (и мажите и жените) привлечни за сите што се дел од општеството, а особено за спротивниот пол.

„Луѓето кои поседуваат натпросечно количество на еротски капитал се поубедливи и почесто ги сметаат за искрени и компетентни. Ним им е полесно да шират пријателства, да најдат работа, да се венчаат и најчесто заработуваат 15% повеќе од просечните луѓе,“ – вели Хаким.

Хаким смета дека еротскиот капитал треба да се смета за четврт вид на квалитет кој секој од нас треба да го поседува (покрај економскиот, културниот и општествениот капитал).

Таа го разделува еротскиот капитал на 6 елементи (7 за жените во државите каде и плодноста се вреднува):

- Убавина: Денес голем акцент се става и на фотогеничноста. Така, мажите и жените со покрупни очи и усни и истакнати црти на лицето се попривлечни. Конвенционалноста, симетријата на лицата без дамки исто така имаат придонес за привлечноста.

- Сексуална привлечност: Убавината најчесто се поврзува со привлечното лице, додека пак, сексуалната привлечност најчесто се поврзува со секси тело. Во секој случај, сексапилот ги опфаќа и карактерот и стилот, и женственоста и машкоста и начинот на живот. Убавината е статична и лесно е да се фотографира. Сексуалната привлечност се гледа во начинот на кој некој се движи, зборува и се однесува.

- Социјална привлечност: Тука спаѓа учтивоста, шармот и социјалните вештини – способноста да направите другите да се чувствуваат опуштено и среќно, да ве запознаат и да ве посакуваат.

- Живост: комбинација од физичка спремност, социјална енергија и смисла за хумор – ваквите карактеристики се камен темелник за секоја забава.

- Претставување: Начинот на кој се облекувате, вашата фризура, шминка, парфем и накит. Луѓето кои знаат добро да ги комбинираат овие работи делуваат привлечно.

- Сексуалност: Тука спаѓа сексот, енергијата, еротската фантазија, љубопитноста и сите останати особини што го прават партнерот совршен. Оваа е единствена карактеристика која се практикува во приватниот живот а не во јавни ситуации.

Земајќи ги овие карактеристики во предвид, Хаким вели дека жените водат во оваа сфера за разлика од мажите, затоа што повеќе работат на својот изглед. Сепак, тука е и дефицитот на секс, од кој страдаат мажите многу повеќе отколку жените. Истражувањата покажуваат дека желбата за секс и сексуалната активност кај мажите е далеку поголема отколку кај жените, особено кај мажите на 35 години па нагоре. Како резултат на ова, жените се повеќе посакувани како сексуални партнери.

„Секако дека убавите жени можат да го користат нивниот сексапил за да успеат во животот. Меѓутоа, тоа е само начин да се задоволи нивниот недостаток на економска и социјална моќ, што би било сосема нерелевантно кога мажите и жените би се изедначиле. Сепак, јас мислам дека еротскиот капитал е нешто со кое сите ние се пазариме и треба да го гледаме како значаен елемент во нашиот живот. Сексапилот функционира како работна сила“ – заклучува таа.