Доколку сакате да знаете дали вашиот брак ќе опстане, погледнете ја фотографијата на вашиот партнер во алманахот.

Психолозите открија дека според насмевката на луѓето на стари фотографии може да се предвиди дали во подоцнежниот живот ќе имаат успешен брак или не.

При едно тестирање, истражувачите набљудуваа фотографии од алманах, и го рангираа интензитетот на насмевките на скала од 1 до 10. Ниеден од оние кои се котираа високо на листата не се има разведено, додека  пак од оние кои се најдоа на дното, најмалку еден од четворица се развел, велат истражувачите. (Оценувањето го вршеа врз основа на набљудување на два мускула: Едниот ја повлекува устата нагоре, а другиот создава брчки околу очите.)

Во вториот обид, научниците замолија испитаници постари од 65 години да им покажат фотографии од своето детство (просечната возраст на сликите беше 10 години). Истражувачите ја забележаа и рангираа соодветно секоја насмевка, и открија дека само 11 проценти од "најголемите смеачи" се имаат разведено, а истото го сториле дури 31 процент од намуртените.

Општо земено, резултатите покажуваат дека луѓето кои се намуртени на фотографиите имаат пет пати поголеми шанси да се разведат отколку оние насмеаните.

Иако оваа поврзаност е ненадејна, научниците потенцираат дека не можат да заклучат од каде се јавува поврзаноста меѓу смеењето и бракот.

"Можеби смеењето претставува позитивен однос кон животот", вели водачот на истражувањето Метју Хертенштајн, психолог на DePauw Универзитетот во Индијана. "Или можеби насмеаните луѓе привлекуваат други посреќни луѓе, и таквата комбинација може да води до поголема веројатност за подолготраен брак. Не знаеме за сигурно што го предизвикува тоа".

Хертенштајн изјави дека земал во предвид други објаснувања, како на пример можноста дека луѓето кои се смеат почесто привлекуваат повеќе пријатели, и со самото тоа имаат поголема поддршка која прави полесно да се одржи бракот. Или можеби луѓето кои ќе се насмеат штом фотографот ќе ги замоли да го сторат тоа веројатно се со послушен карактер, што може значително да го олесни бракот.

Резултатите од студијата се вклопуваат во поголем модел на истражување кое откри дека многу карактеристики на личноста може да се одредат според делчиња на нејзиното однесување. Во основа, се разоткриваме себеси на најсуптилни, едноставни начини.

Се покажа и дека смеењето на фотографиите е поврзано со голем број квалитети, како општо посреќно расположение.

"Мислам дека нашите резултати одат заедно со огромната литература која беше објавувана во последните пет до десет години, а која укажуваше дека позитивната емоционалност е неверојатно важна во нашите животи", Хертенштајн изјави за LiveScience. "Има многу, многу позитивни последици од позитивното расположение".

Овие наоди се исто така битни затоа што ја утврдија поврзаноста помеѓу фотографии направени кога луѓето биле млади и последиците од браковите што некогаш се случија многу подоцна.

"Таа се базира врз идејата дека она што ни се случува порано во животот во однос на нашата сегашна ситуација и нашата психичка состојба може да предвиди што ќе ни се случи децении подоцна", вели Хертенштајн. "Да се покаже континуитет во тоа кои сме е исклучително битно".