Кога жената е во фаза на овулација, може да открие дали еден маж е хетеросексуалец и тоа без да го гледа во лицето, покажува едно ново истражување направено од страна на психолозите на Универзитетот во Торонто.

Исто така, зголемувањето на романтичните вибрации предизвикува и зголемување на чувствителноста на жените при откривањето дали еден маж е хетеро или хомосексуалец.

„Овој ефект не е очигледен кога жената треба да ја одреди сексуалната ориентација на друга жена," – вели Николас Руле, лидер на истражувањето. „Ова потврдува дека плодноста влијае врз хетеросексуална жена и нејзиното внимание кое е насочено кон потенцијалните мажи кои ги бара за парење."

Во првиот од трите експерименти, 40 девојки требаше да гледаат 80 слики со лица од мажи и да ја одредат нивната сексуална ориентација; 40 од нив беа хомосексуалци, додека пак останатите 40 беа хетеросексуалци. Мажите не се разликуваа во привлечноста или во изразувањето на емоциите, затоа девојките беа оставени само на нивната интуиција.

Девојките претходно дадоа информации за датата на нивниот последен менструален циклус и просечното траење на истиот; ниту една од нив не користеше апчиња за контрацепција.

Истражувачите ја споредија точноста на проценката на девојките со нивната фаза на плодност, и открија дека оние кои се во највисоката фаза на овулација беа најточни при проценката на сексуалната ориентација кај мажите на сликите.

Во вториот експеримент, 34 девојки гледале фотографии со женски лица, од кои 100 биле хомосексуалки, а други 100 биле хетеро. Интересно е тоа што фазата на плодност немала никаква врска со проценката за сексуалната ориентација.

„Овие податоци покажуваат дека прецизноста кај жените варира во текот на циклусот на плодност, но во секој случај, за жените побитни се мажите и нивната сексуална ориентација, па можеби заради тоа се покажаа како повеќе прецизни при одредувањето на сексуалната ориентација кај мажите." – вели Руле.

Оваа претпоставка се користеше во третиот експеримент. Половина од испитаничките требаше да прочитаат приказна во која се опишуваше романтична средба, а другата половина немаше задача. Потоа требаше да дадат проценка за сексуалната ориентација за луѓето на сликите. Истражувачите открија дека средбата во приказната служела како мотивација во нивните проценки, затоа, оние кои читале за романтична средба биле прилично прецизни при одредувањето на сексуалната ориентација на мажите на сликите.